Tigsik

Tigsik ko an nagpaparangururub-ngurob

Ta sa mga ipigpanaong ayuda dai inarabot

Magpasalamat kun an harong dai narugmok

Ta an limang kilong bagas dai ikakapatugdok

Tigsik ko man an mga nakaaging kalamidad

An mga tawo nagkariribong man nanggad

Nagkasiribot sa mga ayuda na sa inda dapat

An paghona sa covid, idinuros na sa dagat

Tigsik ko ining abang sakit nang pagbuhay

Kaya kadakol na kan natuturik o nakakapay

Ipigtutulod pagpatugdok nin mental hospital

Nin huli sa makatorotreste nang kamugtakan

Tigsik ko man an gururang na o guragod

Ining pandemya makatitigbak tulos logod

Nin huli kaining facemask na nakakapuot

kun may hapo delikadong idiretso sa kalot

Tigsik ko ining saro pang nakakapongot

Kun an kadurog pa sa pagturog paraatot

Daog kaiyan an facemask kun makapuot

Orog kun may tapuyas, kaiba pagpururot