Tiripon 2022

1962 kan kami mag-gradwar elementarya sa Milaor Central School naguiguironduman ko an samuyang supervisor sa Milaor district iyo si Mr. Jose B. Tordilla asin an principala si Mrs. Rosario P. Galicia.

An espesyal ming bisita na nagtao nin diploma sa mga gradwaytes iyo si Ms. Sondra Williams, Peace Corps Volunteer kan Amerika sa Pilipinas. Programa idto kan depuntong John F. Kennedy tanganing makatabang sa pag-edukar kan mga aki dapit sa edukasyon, katuninungan asin pag-aramigohan kan mga nasyones sa kinaban.

An tema kan graduation: “Dignity of labor” o an dignidad kan pagtatrabaho kabali na an pag-uma, pagtanom asin agrikultura en heneral.

Iyan man an tema kan sakuyang diskurso sa atubangan kan graduating class, mga maestro y maestras asin sa atubangan kan publiko na nag-iingkaminar sa mga tao na magtrabaho tanganing mabuhay an pamilya asin maogma an kumunidad.

Kan panahon na idto amay na parte kan dekada 60, an ideya o konsepto nin asenso o pag-uswag sa buhay iyo an mag-eskwela, makatapos kolehiyo, magka-igwa nin magayon na trabaho sa Naga, sa Manila o sa abroad, magka-igwa nin magayon na harong asin makapadalagan nin bago asin nagkikintab na kotse.

Pigtitingag kaidto an mga iri-igwahon, menus an mayong-mayo, an mga dai naka-ereskwela, an mga para-uma, orog na an mayong trabaho o empleyo.

Kadaklan kan mga tapos sa Milaor Central pasiring sa Camarines Sur Trades School o sa Agrikultura sa Pili.

Bihira an privates school ta mahal an tuition.

Kami kaidto apat na gayo si Jose Vallejo, si Jun Quijano, Boy Claro asin ako nagkadarakop na mag-eskwela sa Ateneo.

Si iba nakadalagan sa UNC na saro man na pribadong eskwelahan asin mahal an tuition.

An samuyang batch compuesto nin mga eskwela na hali sa balyong salog, Balagbag, Lipot, asin mga barangay sa población na maiigot mag-ereskwela tanganing mag-arasenso.

Darato pa an baha sa Milaor kaidto asin kami mahihilig maglamutaw sa baha asin maglangoy sa sulong asin sa salog.

An samuyang mga magurang husto na sana na mapa-eskwela kami asin makatapos nin high school asin maka-college.

Igwa kadtong iskolar an Peace Corps arog ki Jun Quijano, igwa man dara kan honor na nakua sa elementarya arog kadtong depuntong Adelita Hidalgo asin kan saindong lingkod.

Dakul nakatapos sa high school nin apat na taon, igwa man naabala, igwa man nag-drop out asin nagbaralik sa uma. Igwa nakaarabot sa Manila, igwa nag-eskwela sa Albay, igwang nakaabot sa Kabisayaan na dai na nanggad nagbuelta sagkod ngonyan.

Igwa man dawa dai nakatarapos nag-asenso sa negosyo asin nagrahay an buhay. Igwa nin jueting lords sa Central Luzon. Igwa nakaabot sa San Pablo City sa Laguna, duman nag-ereskwela asin duman na nag-eerrestar. An saro dekana sa sarong kolehiyo duman.

An saro milyonaryang negosyante na nakalibot na sa kinaban.

Ngonyan na taon 2022 haros kabanga na sana kaming natada sa poco mas uminos 100 na gradwaytes ma celebrar kami kan samuyang ika-60ng anibersaryo kan samuyang graduation.

Garadana gabos an samuyang naguin paratukdo poon 1962 haros taon-taon kami nagtitiripon, nagbabarayle sa palitada, sa atubangan kan municipyo, nagpaparada sa tinampo kan población bilang pagpahiling kan samuyang pagkaburunyog asin pagkamoot sa Alma Mater na iyo an Milaor Central School.

Kan taon 2002 sa samuyang ika-40 anibersaryo kami an nanginutan asin nagpundar kan ika-100 na taon poon mamundag an eskwelahan kan 1902 kan mag-abot sa Milaor an mga Thomasites.

Rinibong mga gradwaytes kan Milaor Central na nagtiripon asin nagpuruli sa pag-celebrar kan edukasyon asin pagkamoot sa dagdag na kaaraman kan mga taga-Milaor.

Dai na idto na otro sagkod ngonyan ta an naguin espesyal na bisita pati iyo si Dr. Danilo Gerona na sarong historian na naglektura bako lang sa estorya kan eskwelahan kundi nag-estorya kan bilog na banwaan.

Ngonyan pakalihis kan 60 anyos dakul na an nagtaralikod sa kinaban na samuyang papamisahan arog ki Adi Hidalgo an class salutatorian, asin si Dr. Gene Cataneo na sarong professor asin mathematician.

Mapasalamat man por medyo nin misa an mga nagkatarada pa na anas-anas man kartada 7 an edad. An iba buktot na, an iba may sugkod na naglalakaw, may mga diabetic, igwa man mga mabaskog pa ta sa edad na labing 70 nagtataraktor pa sa uma.

Igwang magagayon an harong garo mansion, igwa man simple sana alagad abang oogma.

An pinakamayaman kan batch 62 iyo an sarong dating US Navy na naguin plant superintendent na nagguiguiribo nin submarino duman sa Hawaii USA.

Retirado na siya pero kinua bilang consultant asin nakalibot na sa bilog na kinaban. Dakul siyang hilom na security kun nag-uuli sa Pilipinas. Maboot, simple asin humilde. An harong niya kadaradakula poon kan ini itugdok.

Bistado an samuyang batch ta burugkos, burunyog asin sararo. An award na tinatao kun nagtitiripon bako sa pinaka-asensado, pinaka-mayaman o pinaka-madunong kundi sa an pig-aapod na soltero award asin daraga award sa mga dai nag-aagom o nagpapa-aragom apesar na gururang na.

May espesyal awards man sa may pinaka-dakul na aki asin dakul na maku-apo.

An saindang motto iyo an magserve asin bakong pagservehan.

Mabuhay an MCS Batch 62!!!