Vocal Señar welcome na sa mayoriang grupo kan SP

Sa ‘‘politica mayong permanteng amigo asin kalaban’’, sa sangguniang panlalawigan kan Camarines Sur maogmang inako an pagbabalik sa kampo kan Villafuerte ni Vocal Vanesa Señar kan tercer distrito kan Camarines Sur.

‘‘Welcome me siya’’ sa mayoriang grupo sa sangguniang panlalawigan. Ini an mga pahayag sa Bicol Mail ni Vocal Romulo Hernandez kan segundo distrito kan Camarines Sur asin nagpupugol bilang majority leader kan SP.

Si Señar nagkumfirmar kan saiyang pagtuwad na sa Anduyog party ni dipuntong Congressman Rolando Andaya Jr. envez nagbalik sa kampo kan mga Villafuerte kaibanan si Alcalde Yepyep Señar na utltimo nang termino bilang jefe ejecutivo kan Magarao, Camarines Sur.

Dai naman sinabi kan vokal kun igwang dahilan an saiyang paghali sa Anduyog maging kun igwang kundisyon sa mga Villafuerte.

Napag-araman na inako na ni Gobernador Louigi Villafuerte asin Bise Gobernador Sal Fortuno Jr. an pagbuelta sa sainda kan mga Señar.

Sa isyu kun posibleng tawan nin committee chairmanship, sinabi pa ni Hernandez magdedepende sa desisyon kan majority members kun siisay an mapahunod.

Antes magtuwad sa Anduyog party an vocal kan tercer distrito kan Camarines Sur kabali siya sa tolong minoriya na dai tinawan nin committee chairmanship maging magpugol bilang miembro.

An nawawalat na mga orihinal na opisisyon iyo sinda Emmanual Llaguno asin Eugene Fuentebella kan ika-apat na distrito kan Camarines Sur. Dai pa natao nin komento an duwang vocal kan pagtuwad sa sainda ni Señar.

Sa ngunian an komposisyon kan mayoriang grupo sa SP iyo sinda Vocal Waren Señar kan premir distrito; Romulo Hernandez saka Niño Tayco kan segundo distrito; Pol Manaog saka Vanesa Señar kan tercer distrito; Dona Onate. Shai Noble, saka Butchokoy Oliva kan ika-limang distrito; asin mga ex-officio members Russel Pala asin Alejo Sayson. (dpa)