1,338 escuelahan balik na sa in person classses

Ciudad nin Legazpi --- Luway-luway nang nagdadakul an mga escuelas publica sa Department of Education (DepEd) Bicol kan nagbubukas sa limited face-to-face classes (F2F) base sa listahan igwa nang maabot sa 1,338 nagbalik sa total na 4,500 na escuelahan kaayon digdi an maabot sa 45 pribadong escuelahan.

Sa gabos nang anom na provincia kan rehiyon mientras na an iba yaon na sa pag-proceso kan mga rekisitos na pigmamando kan opisina sentral kan ahencia asin pig-uuyonan na kan nakakasakop na lokal na gobierno.

Si Regional Director Gilbert Sadsad nagpahayag na an saindang Regional Management Committee iyo an nagkumfirmar kan listahan, alagad an gabos na expansion schools dapat nakapasar sa School Safety Assessment Test (SSAT) asin nagkumple sa Interim Guidelines on Expansion of Limited Face-to-Face Classes kan saindang opisina sentral.

Sinabi pa an guidelines sa expansion school dapat pasado sa SSAT, sa mga lugar na nasa irarum kan Alert level 1 asin 2, aprubado kan lokal na gobierno.

Alagad dawa nagbabalik na sa normal kaipuhan man giraray na igwang ‘‘written consent’’ an saindang magurang o guardians na tinutugotan na magklase na sa F2F.

Inaprubaran man kan DepEd an kahagadan kan mga pribadong escuelahan sa rehiyon na i-adaptar an pig-iimplementar nindang in person classes modality.

Sa pinaluwas na directiva kan sentral opisina tinutugotan na an mga estudiantes na maglaog sa klase dawa dai bakunado, alagad dapat seguradohon kan escuelahan na nagsusunod sa health and safety protocols.

Nagkapera nang mga escuelahan an tinugotan na kan ahencia para sa face-to-face graduation sa mga ciudades asin banwaan na yaon na sa Alert level 1 asin 2.

Sa posibleng magbalik sa full face-to-face classes, an isyung ini yaon sa desisyon kan saindang opisina sentral huli ta sagcod sa ngunian an mga experto sa salud dai pa pinapara an pagbutwa kan Covid-19. (dpa)