top of page

1.4-M rehistrado na sa PhilSys kan PSA CSur

Poon na magsikad an pagpalista sa Philippine Identification System (PhilSys) kan taon 2021 hasta 2023, sa sanga kan Philippine Statistics Authority (PSA) kan Camarines Sur abot na sa 70 por ciento an nagparehistro sagcod sa ngunian o igwa nang total na 1.4 milyon sa labi sa 2 milyon na populasyon kan provincia.


Alagad target kan ahencia an 90 hasta 100 por ciento.


Ini an mga pahayag ni Raul Aspe, Supervising Statistical Special Office-in-Charge kan PSA Camarines Sur kan makuanan entrevista kan Bicol Mail sa tahaw kan nagkaperang reclamo na labi nang sarong taon dai pa giraray nakukua si national ID.


Si dai pa nakakarecibe kan saindang ID dapat magpasiring sa saindang bagong opisina sa likodan kan ALDP Bldg. sa Diversion Road kan Ciudad nin Naga dapat darahon an Philsys Transaction Slip alagad kun mayo pa posibleng nasa proceso na sa national printing office.


Pinaliwanag pa ni Aspe, si 30 por cientong dai pa rehistrado kadakli si nasa elementarya na nag-eedad nin cinco anyos pataas. Sa burokasan nin klase nakatalaan magtutok an ahencia sa mga escuelahan alagad si 5 anyos dapat igwang konsente an saindang magurang. Kabali pa digdi si dai na talaga interesado asin dai pa nakakarehistro.


Sa ngunian nagpapadagos an saindang Philsys Registration sa duwang mga mall kan ciudad.


Halowag na an mga nagpapalista mantang 30 por ciento na sana an naghahabol nganing maisyuhan national ID.


Sinabi kan PSA dakulang tabang an national ID huli ta magiging pacil na an serbisyo kan gobierno sa tawo kun igwa nang pugol na PhilSys ID.


Kabali sa pacil na an pagtao nin serbisyo kan gobierno iyo an financial, social welfare, security, health, education particularmente si yaon sa fuerang mga barangay.


Maiinaan naman an mga transaction costs kun rehistrado an arin man na persona asin kan service providers mantang mababawasan an mga hinahagad na IDs.


Hinagad kan ahencia sa mga opisyales de barangay an saindang kooperasyon nganing alokon si dai pa rehistrado na magpasiring sa PhilSys Registration Station nganing magpalista. (dpa)

Comentários


bottom of page