1,433 PNP augmentation force maabot sa Sept. 11 sa NCPO

Pigtalaan na ipadara kan Camp BGen Simeon Ola, Ciudad nin Legazpi an 1,433 na PNP augmentation force sa Septiembre 11, 2025 sa Naga City Police Office nganing dugang na fuersa sa seguridad sa Peñafrancia fiesta, alagad iguang total na 2,154 an iwawarak na kapupulisan sa manlaen-laen na lugar kan ciudad.

Preparado na an Security Task Force kan NCPO na pinamamayohan ni City Director P/Col. Gilbert Parinas, alagad piglinaw ni Lt. Col. Chester Pomar, opisyal na parapahayag kan NCPO na pwede pang mag-dugang an pig-andam na 2,154 na miembros kan PNP huli ta mag-dedepende sa seguridad nganing macierto na matuninong an maabot na kafiestahan ni Nuestra Señora de Peñafrancia.

An Bicol PNP cada Peñafrancia fiesta nagpapadara nin augmentation force nganing maseguro an paz y orden asin mabantayan an manlaen-laen na actividades kan simbahan asin kan ciudad.

An NCPO bako lang matutok sa traslascion asin fluvial procession alagad iguang madedestino sa intelligence section, sa mga matatawong lugar siring kan simbahan, hotel, pagmantenir sa bulos kan trafico, pagbantay sa posibleng mangyaring kriminalidad, medical assistance, search and rescue team, asin dai mahahale an grupo sa cinco minutos na dapat makaresponde na pigmamando kan PNP higher command sa pamamayo ni PNP Chief Gen Nicolas Torre III.

Si BGen Nestor Babagay Jr. na saro man na Bicolano piglalaoman na masungko sa ciudad asin sa NCPO sa mga preparasyon sa mga actividades sa kapiestahan ni Ina.