1.5 milyon estudiantes nagruso sa primerong aldaw nin klase

Alas 6:00 nin aga burokas na an mga escuelahan sa Kabikolan sa primerong aldaw nin ralaogan sa klase kan maabot sa 1.5 milyon na estudiantes kan Martes, Agosto 29.

Piglalaoman na madugang pa an enrollees sa mga public maging sa private school nganing maghabol magpalista mantang kan nagtalikod na school year 2022-2023 halangkaw si numero kan mga nagpalista nag-abot sa 1.8 milyon na estudiantes sa rehiyon cinco kabali na digdi si nagpalista sa ALS.

Si regional director Gilbert Sadsad kan Departamento de Edukasyon sa Bicol nagpahayag na amay si preparasyon kan mga school principal mantang andam na an mga classrooms matapos kan sarong semanang Brigada Eskwela.

An dating problema sa kakulangan mga classroom dai man giraray nahahali mala ngani an iba raraot man giraray huli kan mga nakaaging calamidad, alagad an solusyon pagbanga kan oras igwa aga saka banggui klase.

Siring kan Camarines Sur National High School sa Ciudad nin Naga na igwang 11,000 na populasyon an solusyon ni Principal Sulpicio Alferez III igwa aga asin banggui klase lalo na si nasa senior high school.

Sa provincia nin Albay an Tabaco National High School saro man sa may halangkaw nin populasyon na dai nagbabaya sa CSNHS.

Sa lado kan PNP nagwarak nin kapupulisan sa mga escuelahan para sa proteksyon kan estudiantes asin pagmantenir kan paz y orden.

An Bicol PNP iyo an nagpaluwas nin direktiva sa mga provincial director na seguradohon an pagdestino nin mga awtoridad sa vicinidad kan mga escuelahan.