1-M debotos masungko samilagrosong Amang Hinulid

AMANG HINULID sa Calabanga, Camarines Sur. (DPA/ERA)

Calabanga, Camarines Sur --- Andam na an simbahan, Incident Management Team (IMT) kan LGU asin Municipal Police Station sa banwaan na ini sa piglalaoman na on milyon na debotos na masungko sa milagrosong Amang Hinulid ngunian na Juevez asin Viernes Santos.

Mas mahibog an piglalaoman na masungko sa bantugan na Hinulid huli ta buelo na an mga debotos matapos kan pandemya.

An pagtaraid na mga banwaan kan Calabanga igwa man nakawarak na kapupulisan sa highway na aagihan kan ribo-ribong malakaw penetencia pasiring sa Amang Hinulig.

Si Alcalde Eugene Norman Severo nagpahayag kan Marso 14, 2024 nakaalerto an Incident Management Team mantang igwang augmentation force hali sa PNP Provincial Office na magigin katuwang sa pagmantenir kan paz y orden asin bulos kan trafico pasiring sa Barangay Salud na namumugtak digdi an Chapel kan Amang Hinulid sagcod sa centro kan banwaan.

Abot sa 250 kapupulisan an iwawarak sa Barangay Santa Salud pasiring sa Amang Hinulid Chapel saka suhay man an madedestinong awtoridad sa centro sa panahon kan prosesyon sa Juevez saka Viernes Santo.

Ribo-ribo aroaldaw an piglalaoman na makikisumarong debotos saka turista huli ta hinali na si mga limitasyon matapos mawara na an peligro sa pandemya.

Hinagad kan IMT sa mga magamit nin drone dapat magkua nin permiso sa LGU.

Si P/Capt. Marlon Lladoc, opisyal na parataram kan PPO nagpahayag antes pa kan Semana Santa pinadara na an saindang augmentation force sa MPS.

An actividad relihoso sa banwaan kan Calabanga kabali na sa contingency plans kan PNP.

Sa lado kan Santa Salud Barangay Council, si Punong Barangay Aldrin Macawili magiging katuwang kan PNP sa pagmantenir kan paz y orden asin sa bulos kan trafico.

Madestinong kapupulisan sa mga banwaan sa aagihan kan ribo-ribong malakaw penetencia hali sa Milaor, Ciudad nin Naga, Canaman, Magarao, Bombon magin si hali sa Tinambac.