1-M devotees, mga bisita nagruso sa Pilgrim City

Matapos kan duwang taon na mayong selebrasyon kan Festividad ni Ina huli kan pandemya, ngunian na taon liwat nabuhay an piglalaoman kan City Hall maging kan simbahan na maabot nin sobra sa un milyon an maruso na mga lokal asin dayuhan na mga deboto saka bisita sa Pilgrim City.


An Ciudad nin Naga, pigdeclara komo ‘‘Pilgrim City of Naga’’ sa paagi kan Presidential Proclamation na pinirmahan kan dati asin dipuntong Presidente Benigno S. Aquino III kan 2010 asin sa panahon ni dating Alcalde John Bongat.


Nahidaw kan saindang debosyon an mga Bicolano maging si hale pa sa ibang provincia asin nasyon mala ngani kan nakaaging traslacion procession maabot sa 700 mil na mga deboto asin mga bisita nagruso sa ciudad. Huli kaini, sa maabot na kapiestahan kan imahe ni Nuestra Señora de Peñafrancia asin sa fluvial procession malabi sa un milyon an masungko sa ciudad.

TRASLACION. 700K mga deboto nagpartisipar sa prusisyon ki Nuestra Señora de Peñafrancia hale sa Peñafrancia Shrine sundo sa Naga Cathedral. (CEPPIO)


Ini an mga pahayag ni Consejal Sonny Rañola, chairman kan Committee on Tourism sa Sanggunian Panlungsod na dakulang bagay sa pag-uswag sa ngaran na turismo sa ciudad.


Piglalaoman sa gigibohon na fluvial procession sa Septiembre 17 mas maduble an mga bisita asin mga deboto mala ngani naka-alerto na an Naga City Police Office asin grupo kan augmentation force.


Duwang taon apektado an industriya nin turismo sa ciudad maging sa iba pang rehiyon huli kan pandemya asin sa ngunian dakulang bagay pa sa economia mala ngani an mga hotels sa ciudad haros 100 por ciento okupado na, sabi pa ni Rañola.


Sa ngunian an ciudad igwa nang maabot sa 91 hotels, apartelles, lodging houses asin residences asin tourist inns na igwa nang labi sa tres mil na capacidad.


Igwang 45 kan mga establisimiento mga acreditado kan Department of Tourism mantang dai palang nahahaloy operational na an Summit Hotel Naga, Litton Hotel, Uma residences asin an walong Escalon na condominium sa Blumentritt kanto kan Misericordia streets sa Barangay Tinago.


SA NCPO


An Naga City Police Office iyo an nagtatao nin seguridad asin pagmantenir kan paz y orden sa mga bisita asin devotees ni Ina asin El Divino Rostro kabale na digdi an ginibong traslacion procession asin an pig-aandaman na fluvial procession hale sa Naga Metropolitan Cathedral sagcod sa fluvial sa pagoda pabalik sa estaran ni Nuestra Señora de Peñafrancia sa Basilica, Brgy. Balatas.


Sinabi ni P/Col. Nelson Pacalso, City Director kan NCPO maabot sa tres mil na kapupulisan asin miembros kan Philippine Army an yaon sa ciudad antes pa kan traslacion procession nganing maseguro an dalagan kan paz y orden.


An mga miembros kan PNP hale sa Camp Simeon Ola, Ciudad nin Legazpi asin sa mga MPS sa Camarines Sur mantang an militar hale man sa 9th Infantry Division sa San Jose, Pili, Camarines Sur.


Nakawarak an mga awtoridad bako lang sa mga simbahan envez sa centro commercial asin mga terminal mantang igwa pang mga check point.


Sainda nang pig-iimplementar an gun ban poon kan Septiembre 8 nin hapon matapos marecibe kan NCPO an direktiva hale sa Camp Crame. (dpa)