10 escuelahan sa Cam Surpreparado na sa F2F classes

Pili, Camarines Sur --- Sampolo sa 1,097 high schools asin elementary schools kan Department of Education (DepEd) sa Camarines Sur an pasado sa mga rekisitos nganing makabuelta na sa pilot face-to-face (F2F) classes.

Hale sa dating 150 escuelahan sa mga remote barangay kan limang congressional district sa Camarines Sur, alagad sa pagrepaso hinale sa listahan si 140 escuelahan mantang igwa nang caso kan coronavirus disease an barangay.

An pag-andam kan DepEd Camarines Sur sa F2F classes kasunod man kan pagtugot na ni Presidente Rodrigo Duterte asin kumfirmasyon ni Secretary Leonor Briones nganing maggibo na nin preparasyon an mga escuelahan para sa physical classes.

Si mga piling elementary asin high schools sa rural areas na yaon sana sa inaapod na low risk sa Covid 19 an tinutugotan alagad nag-atubang na sa kritical an provincia sa haros aroaldaw na halangkaw na caso.

Si Sueño Luzada, assistant division superintendent kan DepEd Camarines nagpahayag an limang distrito kan provincia igwang 1,097 mga public schools alagad sa ginibong pagserne ninda kun siisay an mga pasadao sa rekisitos nahulog sana sa sampolong mga escuelahan alagad dai naman nginaranan.

Kun sa basic requirement pa sana na dapat zero sa covid case an barangay asin pasil sa transportasyon an escuelahan alagad kun dai pasado digdi hinahale na sa listahan asin dai na kaipuhan maghanap kan ibang checklist sa rekisitos kan saindang opisina sentral.

Sinabi pa an duwang bulan na pilot testing oras na marhay an dalagan asin mayong problema an mga paratukdo asin estudiante lalo na sa paglaban sa virus, ipapadagos giraray sa laog nin duwang bulan alagad an pilot testing puedeng suspendiron kun magkaigwang problema sa salud.

An pagbaba kan mga escuelahan na dapat pasado kuta na sa physical classes sa tahaw kan padagos na paglangkaw kan caso kan Covid-19 sa Camarines Sur asin nakabandera sa General Community Quarantine classification.

An Parent Teachers Association (PTA) maging mga paratukdo nagpapabor na sa F2F classes nganing matutukan kan mga estudiantes an saindang pag-adal lalo na kun mayo nang oras an magurang na ma-atendir an mga blended learning ngunian na pandemya. (dpa)