10 escuelahan sa Camarines Sur kaayon na sa in-person classses
Sampulong mga escuelas publica sa Camarines Sur makakaayon sa face-to-face classes sa Bicol alagad antes iimplementar asin talaan kan pagsikad nin klase hinahalat nalang an memorandum hale sa saindang opisina sentral.
Si Assistant Division Superintendent Sueño Luzada kan Department of Education (DepEd) sa Camarines Sur nagpahayag na nagsunod sinda sa guidelines na pigmamando kan saindang ahencia mantang an mga barangay sa sampulong escuelahan gabos negativo sa caso sa coronavirus disease.
An ahencia nagconducir nin mga validation asin assessment activities sa paagi kan School Safety Assessment Tool nganing maseguro an seguridad sa safety and health protocols sa gigibohon na F2F classes.
Iyan base sa guidelines kan DepEd national office asin man sa national IATF para sa salud kan mga kaakian.
Sinabi pa ni Luzada an mga escuelahan gabos sa elementarya na kaayon sa in-person classes kinababalehan kan minasunod; San Juan Elementary School, Sinuknipan Elementary School asin Del Gallego Salvacion Elementary School gabos sa municipalidad kan Del Gallego, Camarines Sur sakop kan premirong distrito mantang an pito hale sa municipalidad kan Sipocot, CSur, Bolo Sur Elementary School – Sipocot North; Sipocot North Central; Solidad Villafuerte Elementary School; Sipocot North Tula-Tula Elementary School; North Villazar Elementary School- Sipocot North; asin Mangapo Elementary School, Sipocot South.
Sinabi pa kan DepEd an sinambit na mga escuelahan pasado sa ginibong granular assessment kan Department of Health asin kan Inter-Agency Task Force asin sinda dugang na mga escuelahan pampublico na maimplementar na kan in- person classes.
An mga escuelahan kadakle yaon sa mga hararayong barangay na dai na inabot kan Covid-19 case asin an duwang mga banwaan klasificado bilang mga nasa low risk sa virus.
An dugang na escuelahan sa Camarines Sur dagdag man sa enot na siyam na escuelahan sa Bicol na naghahale sa Masbate, Ciudad nin Ligao sa provincia nin Albay asin Ciudad nin Sorsogon. An mga escuelahan na digdi enot nang nagconducir kan saindang limited pilot face-to-face classes kan Noviembre 15 hasta sa Enero 15, 2022.
Piglinaw kan DepEd na an mga estudiantes na maparticipar sa F2F kaipuhan igwang permiso sa magurang asin limitado sana sa classroom mantang an saindang klase tolong veces cada semana asin an natatadang duwang aldaw buelta sa modular learning.
Sa mga pararukdo dapat sinda fully vaccinated nin vaccines contra sa Covid-19.
Sa Ciudad nin Naga na suhay man an saindang school division, sinabi ni Supt. Manny De Guzman an Panincuason Elementary School iyo sana an mapuon na kan klase sa Deciembre 2. An escuelahan na ini yaon sa laog kan barangay na zero sa caso sa Covid-19. (dpa)