10 PB sa Naga para ki Robredo pagka alcalde

Ni Paulo DS. Papa

SAMPOLONG punong barangay sa Naga an naglantad na kan saindang pagsuporta ki dating bise presidente Leni Robredo na madalagan para sa kargong alkalde kan syudad.

Marurumdoman enot na pigsabi ni Punong Barangay Angelo Bendiola kan Igualdad, parehong syudad na siyam sanang kapitanes de barangay sa Naga an naglantad kan saindang suporta sa abogada kun saen ngani ini kabale.

Alagad kan Lunes, Hulyo 15, ngonian na taon pigdeklara ni Punong Barangay Noel Constantino kan Mabolo, sa Naga na saro man ini sa mga kapitan sa syudad na lantad na man na suportador ni Robredo.

Huli digdi an block 9 na pigmimidbid nagin nang sampolo kinababalehan ninda Punong Barangay Apolinario Malana Jr. kan Barangay Abella, Leoncio Libuit kan Barangay Carolina, Ruel Limbo kan Barangay Pacol, Alfonso Rodriguez kan Barangay San Felipe, Cyrus Caballero kan Barangay Sabang, Monex Arevalo kan Barangay Triangulo, Estelita Bautista kan Barangay Tinago asin si Lisa Carmona kan Barangay Tabuco apwera pa sa duwang opisyales na enot na nasambit sa baretang ini.

Dae na man piggilid ni Bendiola an posibilidad na madugangan pa an mga kapitanes digdi na masuporta ki Robredo, mala ngani nagdugang si Constantino susug na man sa saiyang pahayag kan Lunes.

Dugang pa ni Bendiola, dati nang solido an saindang suporta ki Robredo dawa kan mga panahon na dae pa nagdesidir si Alkalde Nelson Legacion na magdalagan para sa kargong diputado kan tercer distrito kan Camarines Sur.

Mantang pigsusurat an report na ini mayo pa man ibang pangaran na nagluluwas na madalagan para sa kargong alkalde kan syudad na mabangga ki Robredo.

Robredo sa Naga mantang Legacion, Magtuto sa tercer distrito

Apesar kan paglantad niya kan saiyang suporta ki Abogada Robredo sa pagdalagan kaini para sa kargong alkalde kan syudad, dae pa man nawara an suporta ni Kapitan Libuit kan Carolina an suporta ki Alkalde Legacion na madalagan sa pagka deputado kan tercer distrito kan Camarines Sur.

Si Libuit kabale sa Block 9, kompwesto kan siyam na punong barangay sa Naga na naglantad kan saindang suporta ki Robredo, kinababalehan man ni Punong Barangay Angelo Bendiola, kan Igualdad na iyo ngani an nagpamidbid sa grupo.

Marurumdoman na sinabi ni Punong Barangay Angelo Bendiola na solido an saindang suporta sa abogada bago pa man magdesidir na magdalagan an alkalde para pagka kongresista.

Alagad kan nakalihis na Sabado pigsabi ni Libuit na an suporta kaini sa alkalde dae man napara asin naheheling kaini na magayon an presenteng sitwasyon ninda Robredo asin Legacion sa politika huli na man ta dae mabanggaan para sa parehong pusisyon.

Si Libuit bantugan na suporter kan alkalde na nagsuporta man digdi kan nakalihis na barangay and SK elections.

Mientrastanto, si Constantino kan Mabolo aminadong Robredo siya sa Naga alagad an suporta kaini yaon man sa negosyanteng si Nonoy Magtuto na dating nadaog sa laban para sa pwestong kongresista kan Partido area.

Sa presente, si Magtuto nagpapabisto komo aspirante sa pagdalagan para pagka diputado kan tercer distrito, makakabanggaan an suboot amigo kaining si Legacion.