100% kan mga opisyal kan PNP sa Bicol nagdemiter sa puesto

Ciudad nin Legazpi --- Urgulyo kan Bicol PNP ki Department of the Interior and Local Government (DILG) Secretary Benjamin Abalos Jr. na gabos na opisyal kan Philippine National Police sa Bicol nagkumple sa saiyang directiva sa boluntaryong magbutas sa puesto na ultimo diya kan Martes, Enero 31, 2023.

Si Abalos nagbisita sa Ciudad nin Legazpi kan Enero 27, 2023 sa ginibong paglansar kan ‘‘Buhay Ingatan Droga’y Ayawan’’ (BIDA) na pinangenotan kan sekretaryo, jefe kan Bicol PNP, Brig General Rudolfo Dimas asin iba pang ahencias de gobierno.

An BIDA sarong advocacy program nganing magbaba an droga sa paagi kan pagtarabangan kan kumonidad asin maging kan publico nganing labanan an ilegal na actividad.

Kinumfirmar sa Bicol Mail ni Lt. Col. Malou Calobaquib, opisyal na parataram kan Camp Semion Ola na gabos na mga opisyal na kinababalihan nin duwang Brig. General asin 26 na Colonel nagpirma sa saindang courtesy resignation na pinangenotan kan saindang pamayo na si Heneral Dimas perang aldaw sana matapos kan directiva ni Abalos.

An orden sa boluntaryong pagbutas sa puesto kasunod kan paglinig kan DILG sa organisasyon kan PNP sa ilegal na droga.

Dai palang nahahaloy an Police Cavaliers Association (PCA) na pinamamayohan ni Major General Valeriano de Leon nangapudan sa natatada pang onseng opisyal kan PNP na magsumiter na kan saindang courtesy resignation antes magpaso an deadline kan Enero 31, 2023.

Sinabi ni Dimas na saro sa saiyang higot na kampanya iyo an paglaban sa ilegal na droga mala ngani sunod-sunod an mga suprisang drug testing sa mga opisyal kan PNP sa rehiyon cinco.

Ini parte kan saindang ‘‘cleansing’’ sa laog kan Bicol PNP, sabi pa.

Sinabi pa kan DILG Secretary na saiyang inuomaw an PNP sa kabikolan huli kan halangkaw na acomplisimiento sa laban kontra droga. (dpa)