top of page

100% kan UV express sa Bicol nagpa-consolidate

Saludo an Land Transportation Franchising and Regulatory Board (LTFRB) Bicol sa mga operator kan UV Express huli ta sangatos por ciento an nakapag-consolidate kan saindang units matapos makumpleto an rekisitos sa PUV modernization program.


Si LTFRB Regional Director Joel Defeo nagsabi sinda dapat pag-arogan huli ta nagsusunod sa mga reglamento asin policia kan gobierno.


Sa sangatos por ciento iguang total na 1,184 na consolidated units sa Kabikolan mientras na 4,780 o 94 por ciento mga public utility jeepneys.


Sa pag-atubang sa miembros kan media, sinabi kan jefe kan LTFRB sa Bicol na iguang total na 89 por ciento hale na sa gabos na klase nin pampasajerong vehiculo sa rehiyon.


Sa mga nagsinutil na operator sa pigmamando kan gobierno sa consolidation pigseguro kan ahencia na masunod sinda sa ‘due process’ antes kan ano man na aksyon laban sa unconsolidated.


Boot sabihon segun ki Defeo mapadara an ahencia nin ‘show cause order’ sa mga operator nganing magpaliwanag asin magkakaigua ngona nin hearing huli ta yaon kita sa democratikong gobierno.


An efecto kaini, nakatalaan cancelaron an franquicia mantang preparado an Land Transportation Office na darakopon an nagsinutil na mga operators.


Sarado na an gobierno sa ano man na extension sa consolidation process na nagtapos kan Abril 30, 2024 mientras na si Presidente Ferdinand Marcos Jr. an nagtapos kan ano man na pagpalawig.


An modernization program sa PUVs panahon pa ni dating Presidente Rodrigo Duterte alagad pinalawig sagcod inabot kan bagong administrasyon.

Commenti


bottom of page