121K rehistradong botantes sa CSur paparaon sa listahan

An mga opisina lokal kan Comelec sa Camarines Sur naglilibot sa mga barangay sa paagi kan satellite registration nganing mabawi an 120,727 sa paparaon nin mga pangaran nin rehistradong botantes huli kan pagpalyar na makaboto sa eleksyon nin duwang beses. Kabali digdi sa listahan an 10,700 na mga pangaran hali sa Ciudad nin Naga.

Sa pinaluwas na datus kan opisina rehiyonal kan Comelec Bicol sa anom na provincia, an Camarines Sur iyo an nangengenotan sa listahan na dapat ma-‘deactivate’ na mga pangaran nin botantes sa pigtalaan na Election Registration Board (ERB) hearing sa Abril 15, 2024.

Base sa listahan kan Comelec Bicol igwang total na 323,340 rehisradong botante na duwang beses sunod-sunod nagpalyar makaboto kan 2010 asin Sangguniang Kabataan, Barangay elections kan Oktubre 30, 2023.

An mga ‘‘deactivated voters’’ makakarecibe kan saindang noticia hali sa kanya-kanyang opisina kan Comelec alagad tutugotan giraray na mag-apply para sa reactivation kan saindang records tanganing makaboto sa masunod na eleksyon, sabi pa kan Comelec Bicol.

Comelec Bicol Regional Director Ma. Juana Valeza nagpahayag nganing maglangkaw an numero kan mga nagpapalistang aplicante nagluluwas sa saindang mga opisina an mga personajes kan Comelec para sa satellite registration sa mga Mall, escuelahan patin sa mga barangay.

An pagpalista sa Comelec nagpoon kan Febrero 12 hasta Septiembre 30, 2024 bilang pag-andam kan commission sa nakatalaan na midterm elections sa Mayo 2025.

An iba pang provincia na may listahan na paparaon an mga pangaran nin rehistradong botante sa Albay, igwang 66,676, sunod an Masbate na igwang 56,502; Sorsogon 36,202; Camarines Norte 16,987 mantang mayo pang listahan sa hali sa Catanduanes.

An pagbasura kan mga pangaran na dai na nagboboto nin duwang beses base sa Section 27 kan Voter’s Registration Act of 1996.