15k na bagong botante an target kan Comelec Naga

Halangkaw an numero kan piglalaoman na voters registrant sa Ciudad nin Naga na nagpoon kan Oktubre 20, 2025 hasta Mayo 18, 2026 mantang aaboton sa pitong bulan an target kan Commission on Election digdi 15 mil na mapalista.

Bakong arog kan Agosto 2025 nagdurar sana nin sampolong aldaw inabot sana sa tres mil an nagpalistang botante.

Ini an mga pahayag sa Bicol Mail ni Election Officer Atty. Maico Julia Jr. alagad sa ngunian hababa pang mga registrant an nagpapalista sa saindang opisina.

Lunes sagcod Sabado bukas an saindang opisina nganing magrecibe nin mga aplikante. Sinda matalaan nin mga satellite registration sa mga barangay asin sa Mall.

Kabale sa dapat magpalista siring kan ‘‘reactivation, transfer of registration, new registration and modification of items in the registration’’, sabi pa ni Julia.

Base sa Acta Republica 12232 an enot na pigtalaan na December 2025 Barangay and Sangguniang Kabataan (SK) Elections dinakit sa enot na Lunes kan Noviembre 2026.

An ley nagtutugot sa mga incumbent Barangay asin SK officials hasta sa Noviembre 30, 2026, bilang hold-over capacity.

Mientras tanto, padagos pang hinahalat kan Comelec an desisyon kan Corte Suprema kun idadagos o uktaba an sinambit na pirilian kasunod kan sinangat na petisyon ni Election Lawyer Romulo Macalintal contra sa pag-uktaba kan congreso sa sinambit na Barangay asin SK elections.