184k na votantes sa CamSur hinale sa listahan kan Comelec

An Commission on Election Comelec (Comelec) sa Camarines Sur nanghihinayang kan maabot sa 184,000 na rehistradong votantes kan provincia an pig-deactivate o hinale na sa listahan matapos duwang veces nang magkasunodan na nagpalyar nagvoto sa eleksyon.


Alagad piglalaoman sagcod sa ultimo dia kan voters registration sa Septiembre 30 pueding magsakat sa 1.5 milyon an rehistradong votantes sa provincia.


Si Abogado Noriel Badiola, Provincial Election Supervisor (PES) sa Camarines Sur nagsabi an mga hinali sa listahan resulta kan mga ginigibong pagserne kan listahan kan mga registered voters sa cada Election Office sa 35 municipalidades asin duwang ciudades.


Igwang mga hinale na huli ta binawian nin buhay asin nagtatrabajo sa abroad asin si iba pang duwang veces nang dai nagvovoto sa eleksyon.


Alagad segun ki Badiola si dai pa nakakarehistro sa mga opisina lokal kan commission puede pang maghabol mantang sagcod na sana sa Septiembre 30 an voters registration.


Sagcod sa ngunian mayo pang Comelec resolution sa extension kan aldaw nin pagpalista mientras na madidificilan na an commission sa saindang preparasyon sa national asin local election sa Mayo 9, 2022 asin nagtutubod an Comelec CamSur na dai na matugot an saindang central office sa kahagadan kan nagkaperang mga lehislador.


Sa Oktubre 1 hasta 8 iyo naman an saindang sunod na actividad para sa pagplantiar nin certifico de candidatura sa mga candidato lokal asin nasyonal.


Kinumfirmar pa ni Badiola na posibleng sa bulan nin Noviembre 2021 iimplementar na an pag-ukag kan mga election officer, PES asin regional directors.


Siya nakatalaan madestino sa Comelec Masbate asin an maribay sa saiya si hale sa provincia nin Albay.


Sa Ciudad nin Naga, madedestino na si Comelec Officer Maico Julia Jr sa Catanduanes asin an maribay sa saiya iyo si Abogado Francis Nieves, election officer kan Daet, Camarines Norte.


Si Abogado Maria Juana Valeza, Comelec regional director nakatalaan madestino sa rehiyon IV, mientras na si Abogado Noli Pipo, hale sa rehiyon uno iyo an maribay sa saiyang puesto.


Mientras tanto, an mga election officer sa municipalidades sa Camarines Sur iyo man an isusunod alagad magriribayan sana nin puesto sa limang congressional district. (dpa)