2.1 por ciento kan 4Ps sa Naga graduado na

Maabot sana sa 2.1 por ciento an nahale sa listahan kan mga benipisyaryo kan 4Ps sa Ciudad nin Naga matapos maggraduar na sinda asin dai na calificado na magcobra nin biyaya hale sa gobierno.

Si Annabelle Vargas, jefe kan City Social Welfare and Development Office (CSWDO) kan lokal na gobierno kan Ciudad nin Naga nagpahayag na an 2.1 por ciento miembros igwang bilang na 126 sa 6,000 na benipisyaryo hale sa 27 barangay kan ciudad.

An saindang mga aki tapos na sa pag-adal sa secondarya mantang an iba sa colegio asin igwa nang trabajo na nakakatabang na sa pagbuhay kan tios na familia.

Alagad sinabi pa ni Vargas dawa dai na sinda calificado na magpadagos komo recipientes kan 4Ps puedeng matawan pa nin asistensya kan City Hall nganing matabangan giraray kun kinakaipuhan.

Piglinaw man kan DSWD na si listahan kan mga benipisyaryo kan 4PS sa ciudad nagpapadagos na magrecibe kan saindang biyaya mantang mayo man direktiva o memorandum an national IATF na si dai pa bakunado nin duwang dose contra sa coronavirus disease dai na dapat magrecibi kan bulanan na sustento kan govierno.

Mga proposal pa sana kan ibang ahencia de gobierno alagad mayo man nin ley na aprubado sa congreso na mandatory na an vaccination sa miembros kan 4Ps.

An ibang miembros na takot magpa-bakuna nahahadit na dai na makarecibe kan biyaya hale sa DSWD, alagad mayo man nin ley na ‘‘no vaccine, no subsidy’’.

Igwang mga ‘‘undecided’’ magpa-bakuna alagad napipiritan nang magdalagan sa mga vaccination site huli sa kahaditan na maputol an saindang biyaya sa tahaw kan pagtios ngunian huli kan pandemya.

An DSWD pig-eenganyar na magpatudok man giraray dawa dai man mandatory kan gobierno. (dpa)