2,183 declarado na bilang drug-cleared brgys sa Bicol

Kasunod kan pagtao nin onra ni DILG Secretary Benhur Abalos Jr. sa halangkaw na acomplisimiento kan Police Regional Office sa Bicol (PRO-5) sa paglaban sa ilegal na droga, sa ngunian igwa naman biniklad sa nagdudugang na Drug-cleared barangays.

Sa pinaluwas na report kan PRO-5 sa pamamayo ni P/BGen. Rudolph Dimas igwa naman nin dugang na pigdeclara bilang drug-free sa rehiyon.

Hali sa dating 2,170 drug cleared barangays, an rehiyon Bicol igwa nang total na 2,183 na barangay an kumfirmado na drug-free.

Sa ginibong conferencia kan miembros kan Regional Oversight Committee on Barangay Drug Clearing (ROCBDC), igwa naman nin dugang na trece barangays an pigdeclara komo drug-cleared kan Feb 9, 2023.

An mga barangay na ini kinababalihan kan Brgy. Calabaca, Capalonga, Camarines Norte; Brgy. Baligang asin Brgy. Naisi, parejo kan Ciudad nin Ligao kan Albay.

Sa Catanduanes apat na barangays an hinali bilang ‘‘drug affected barangays’’ na kinababalihan kan Brgy. Tubli sa Caramoran asin Brgy. Capilihan, Brgy. Francia; asin Brgy. Sto. Domingo, gabos kan municipalidad nin Virac.

Mantang anom na barangays sa Camarines Sur an dai na kaayon komo ‘‘drug affected barangays’’ asin ini kinababalihan kan Brgy. Sta Rita sa Del Gallego, Brgy. Lapurisima sa Ciudad nin Iriga, Brgy. Bahao sa Libmanan, Brgy. Poblacion Central sa Ocampo, Brgy. Hubo sa Pasacao, asin Brgy. San Antonio sa Tigaon.

An Regional Oversight Committee igwang binabasehan nganing an sarong barangay ideclara bilang drug-cleared.

An PRO5 magpapadagos sa saindang trabajo asin pagtarabangan sa mga ahencia sa paglaban sa ilegal na actividad.

An Sorsogon iyo an may pinakalangkaw na drug cleared barangays na igwang 97 por ciento asin Catanduanes 93 por ciento.

Sa paagi kan ‘‘Buhay Ingatan, Droga’y Ayawan (BIDA), na programa ngonian ni Sec. Abalos bakong lang PNP an envuelto digdi envez nagkapera pang mga ahencias de gobierno.