2,359 aksidente sa vehiculo 158 gadan, 1,668 iredo-LTO

Maabot sa 27 por ciento an mga nangyaring aksidente sa tinampo sa Kabikolan sa laog nin pitong bulan sa peryodo puon kan Enero 2021 hasta Agosto 2021 na kunsideradong nagbaba huli kan pandemya.

Sa kaparejong peryodo igwang total na 2,360 aksidente sa tinampo mantang an 158 digdi mga binawian nin buhay asin 1,668 mga nairedo, alagad an may halangkaw na aksidente iyo an Albay asin Camarines Sur.


Sa paggirumdum kan ‘‘World Day of Remembrance for Road Cross Victims’’ kan Noviembre 21, 2021 naglalaom an opisina regional kan Land Transportation Office (LTO) sa Bicol na dapat maibaba ini sa 30 por ciento.


Kan Noviembre 21 an simpleng programa kan LTO Bicol iyo an pa-misa sa mga simbahan para sa mga biktima sa road cross na padreno an mga district office mantang an Bicol Medical Center nagkaigwa man nin candle lighting.


Si Director Francisco Ranches nagpahayag sa Bicol Mail kun sa United Nation target na magbaba sa 50 por ciento an mga road cross alagad digdi sa Kabikolan piglalaoman na kakayahon an target na treinta por ciento.


Admitido ni Ranches na an 27 por ciento aksidente kunsideradong hababa ngunian na taon huli kan pandemya mantang kulang nagruruluwas na mga tawo asin vehiculo.


Sa saindang datus sa ‘‘road cross’’ puon kan Enero 2021 hasta Agosto 2021 an Albay igwang 793 na aksidente an 47 digdi binawian nin buhay asin 473 mga iredo; Camarines Sur igwang 736 na aksidente, 57 binawian nin buhay asin 752 mga iredo; Sa Ciudad nin Naga igwang 523 aksidente, apat binawian nin buhay asin 158 mga iredo; Camarines Norte – 136 aksidente, 16 binawian nin buhay asin 155 mga iredo; Sorsogon – 145 aksidente, 26 binawian nin buhay asin 84 mga iredo; Masbate – 26 aksidente, 7 binawian nin buhay asin 43 mga iredo asin Catanduanes – 1 aksidenye, saro binawian nin buhay asin tolo mga iredo. Igwang total na 2,360 aksidente, 158 binawian nin buhay asin 1,668 mga iredo. An listahan na ini hale sa report sa sainda kan PNP Region V.


An mga disgracia sa tinampo huli kan mechanical defect asin human error, alagad padagos na an mga ginibong advocacia kan ahencia sa paagi kan programa ‘‘Kaligtasan sa Kalsada’’.


Kaayon sa pinapagirumdum ninda sa paagi kan pagtukdo kun panong makakalikay sa aksidente sa tinampo maging kan pagkumemurar kan National Day of Remembrance for Traffic Safety.


Sinabi pa kan LTO Bicol kabale sa saindang ginigibo iyo an mandatory seminar sa mga tsuper para sa kumprehensibong pagkanuod.


Pagkaigwa nin examinasyon asin driving course nganing mahasa sinda sa pagmanijo na dapat maging disiplinado. (dpa)