2 Bicolanong diputado vs Cha-Cha

Duwang Bicolanong congresista nanindugan na dai pa napapanahon an pigtutulod na pag-enmienda kan 1987 constitution sa tahaw kan inaatubang na inflation rate na nagsakat na sa 8.7 por ciento, yaon pa an epekto kan pandemya sa ekonomiya asin bilyones pesos na ilulustay kan gobierno sa mga delegado sa constitutional convention (Con-Con).

An mga nagpahayag kan saindang panindugan sa congreso sinda Congresista Gabriel H. Bordado Jr. kan tercer distrito kan Camarines Sur asin Congresista Edcel Lagman kan premirong distrito kan Albay.

Si Bordado, assistant minority leader iyo an premirong representante na nag-‘‘interpellate’’ sa chairman kan Committee on Constitutional Amendments, representante Rufus Rodriguez, sa Resolution No. 6 kan duwang camara para sa constitutional convention. Saiyang pinagirumdum si Rep. Rodriguez na si Presidente Ferdinand Marcos Jr. mismo an nagsabi na an pigtutulod na Charter Change bakong prioridad sa saiyang administrasyon. Saiya pang pigsabihan an representante ‘‘I also asked him about the safeguards to ensure the rights and interest of the Filipino people and not a select few would be protected,’’ sabi pa sa FB page kan representante kan CamSur.

An duwang lehislador nagsabi pa na saro pa sa dapat maheling iyo an dakulang fondo gagamiton sa Con-Con na maabot sa P18-bilyon.

Dapat atubangon ngona an dakul na mga Filipinong nag-titios, kakulangan nin pagkakan yaon pa an epekto kan 8.7 inflation rate asin an enot nang pigbuyagyag ni Bordado sa problema sa ‘‘recession’’.

Sinabi pa ni Lagman yaon pa an negativong epekto sa ekonomiya kun idadagos an Cha-cha yaon pa an pinapasan utang kan gobierno na nag-aabot na sa P13.42 trilyon.

An mangyayari kun isasabay an eleksyon sa con-con delegate sarabay sa SK asin Barangay elections sa Oktubre 30, 2023 magkakaigwa nin pamumulitika sa barangay. An SK elections dai dapat nin haloan politica.

An pagcuestion kan duwang Bicolano sa pigtutulod na Cha-cha kasunod kan pagkaka-aprubar na sa senado asin Camara-Baja kan Resolution No. 6 kan House Committee on Constitutional Amendments kan Febrero 20, 2023.

Dinagdag pa ni Lagman ‘‘an ginibong deliberasyon kan duwang Camara sa resolution No. 6 para sa constitutional convention na pigkunducir kan Camara de Representante na mayong miting sa joint session kasabay an Senado langtadan na unconstitutional” (dpa)