2 elehidong director maasumir sa pwesto kasabay kan AGMA

Duwang bagong elihidong mga director kan Camarines Sur II Electric Cooperative (Casureco II) nakatalaan mag-asumir sa pwesto na ma-epekto sa Deciembre 6, 2025 kasabay kan gigibohon na Annual General Membership Assembly (AGMA) sa Ciudad nin Naga.

Sinda Wilson de Castro sulong candidato sa pagka-director sa Canaman District, Canaman, Camarines Sur iyo an pigdeclarang ganador kan election committee sa ginibong eleksyon kan Oktubre 4 mantang sa Calabanga District si Ms. Sofia Pelonio iyo an gana sa eleksyon sa Calabanga, Camarines Sur. Naging matuninong an nagtapos na pirilian sa duwang distrito.

Sinda maserbe sa cooperativa bilang miembros kan junta directiva kan saindang distrito sa laog nin tolong taon.

An eleksyon sa Casureco II perming kulang an mga miembros kan cooperativa an nagpaparticipar sa regular na pirilian cada tolong taon.

Sinabi ni Rinner Bucay, opisyal na parataram kan cooperativa an sainda naman na pig-aandaman iyo an sunod na district elections sa Tinambac asin Siruma District sa Sabado, Oktubre 18, 2025. An lugar kan eleksyon sa Tinambac District gigibohon sa Tinambac Central School asin sa Siruma District gigibohon sa Siruma Central School.

Si Rhonel Velarde, segurado na an kapangganahan huli ta mayong kalaban sa pigtalaan na district election sa Tinambac mantang sa Siruma an magraralaban sinda Amado Avellana, Jessie Delmoro asin Gerardo Marfel Deveza.

Mientras tanto, sa Oktubre 8 hasta 22, 2025 magiging estricto naman an cooperativa nganing putolan nin linya nin kuryente si dai nagbabarayad kan saindang bulanan na electric bill.