top of page

2 sa 18 mga Bicolanong diputado nagvoto vs MWF

Sa diez y ocho mga congresista sa Bicol kabali an apat hali sa tolong mga party-list alagad saludo an mga Bicolano sa duwang ‘‘oragon’’ na congresista hali sa Camarines Sur asin Albay huli kan saindang mga panindugan asin dahilan dai nag-voto pabor sa kontroversyal na Maharlika Wealth Fund (MWF).

Sa 321 total na miembros kan Camara-baja, 279 pabor asin anom an nagvoto kontra kabali an duwang Bicolano.


Si Congresista Gabriel H. Bordado Jr. kan tercer distrito kan Camarines Sur asin Edcel Lagman kan premir distrito kan Albay iyo an nakipag-debate kun tano ta dai pa napapanahon na aprubaran an House Bill 6608 sa atubang kan krisis sa economia epekto kan pandemya, siring kan inflation rate na nagsakat na sa 8 porciento kan Noviembre asin dakulang kautangan kan gobierno nasyonal na nag-aabot na sa Php13.641 trillion sagcod kan Oktubre 2022. Sinabi pa sa report kan Philippine Statics Authority igwa nang 19.19 milyon mga Filipino o 18 por ciento kan populasyon mga nagtitirios.

Sinabi pa ni Lagman an MWF dapat dai paagihon sa fast-tracked an approval. An propuestong Maharlika dapat sernihon na marhay asin mag-agi sa halawig na debate.


An duwa binansagan kan iba sa social media na mga ‘‘Oragon’’ na congressman.


Dakul na mga nag-post sa social media na nagsusuporta sa mga panindugan ninda Bordado asin Lagman, sa FB-post ni Loida Arevalo sinabi kaini ‘‘Approved 3rd and final reading ang MWF.. 279 ang pabor ‘‘6’’ lang ang hindi.. na legislator ang may Malasakit??? Mantang sa FB post ni Glenda Socorro Garcera Abinguna perang oras matapos ma-aprubaran sa 3rd reading an controbersyal na bill sinabi kaini, ‘‘I seldom posts for appreciation but this time my appreciation went to the 6 congressmen who have the courage to say NO and who voted against the passing of MWF/ Congressman from 3rd district of Camarines Sur, Cong Gabriel Bordado and 1st District of Albay Cong. Edcel Lagman.’’


An iba pang nagkontra sinda Gabriela Party-list Congresswoman Arlene Brosas, ACT Party-list Congressman France Castro, Congressman Mujiv Hataman kan Basilan asin Congressman Raoul Manuel kan Kabataan party-list.


An mga nag-voto pabor sa MWF kinababalihan kan hali sa Camarines Sur na sinda, Congresista Tsuyoshi Anthony Horibata kan premir distrito; Congresista LRay Villafuerte kan segundo distrito; Congresista Arnie Fuentebella kan ika-apat na distrito; asin Congresista Migz Villafuerte kan ika-limang distrito.


Sa Albay kinababalihan ninda, Congresista Joey Salceda asin Congresista Fernando Cabredo kan tercer distrito.


Sa Masbate, an magturogang na Congresista Ricardo Kho; Olga ‘‘Ara’’ Kho; asin Wilton ‘‘Tonton’’ Kho.


Sa Sorsogon si Congresista Wowo Fortes; asin Catanduanes si Congresista Eulogio Rodriguez.


An mga Bicolano na yaon sa party-list kinababalihan ninda Congresista Elizaldy Co asin Jil Bogalon kan Ako Bicol. Congresista Wilbert Lee kan Agri-Party-list asin Congresista Nicolas Enciso kan Bicol Saro.


An mga principal authors sa bill iyo sinda House Speaker Martin Romualdez, an saiyang pamangkin Senior Deputy House Speaker Sandro Marcos sagcod na nag-co-authors an maabot sa 90 porciento kan lihislador. Dakul an nag-ayon na maging co-authors matapos kumfirmaron ni Presidente Marcos na siya an nasa likod kan MWF asin saiyang pig-certificaran bilang urhente na dapat tawan nin prioridad. (dpa)

Σχόλια


bottom of page