top of page

20 binawian nin buhay sa aldaw kan Semana Santa

Heneralmente naging matuninong si mga aldaw kan kamahalan sa Kabikolan base sa pinaluwas na report kan Bicol PNP alagad poon kan Abril 1 hasta Abril 9, 2023 maabot sa veinte (20) an mga nagkagaradan huli kan pagkakalamos na iyo an may halangkaw na insidente, pambabadil, mga aksidente sa trafico asin nakuryente.


Alagad sinabi ni Lt. Col. Malou Calubaquid, opisyal na parataram kan Camp General Simeon Ola kan Bicol PNP kadakli kan mga nalamos na eskursyonista sa beach resort mga menor de edad.


An mga insidente sa tahaw kan padagos na patanid kan mga awtoridad na bantayan an mga menor de edad asin dapat dai mag-inom nin arak kun malangoy sa dagat.


Sa Camarines Sur iyo an may halangkaw na caso na nangyari sa Brgy. Dolo, San Jose kan Jueves, Abril 8, 2023 na kinababalihan nin apat na menor de edad asin duwang 18 anyos. An mga biktima kinababalihan kan mga magpirinsan na sinda, Rizza Hermosa 17 anyos; Jona Hermosa 17 anyos; Rhea Pino 18 anyos, Rafael Pino 18; Regine Pino 16; asin Ashley Rose Hermosa 16. An mga biktima anas taga Barangay Catagbacan, Goa, Camarines Sur.


Duwa man an nalamos sa Pasacao, tourist capital kan Camarines Sur na kinababalhan ninda Noel Olino, 29 anyos, may agom asin residente kan Malibtong Olad Pequeño, Tinambac, Camarines Sur. Nangyari an insidente kan ini magtampisaw sa Beach 22 Resort asin an sarong menor de edad na pigbisto kan MDRRMO, Rommel Bagadion, 8 anyos kan Brgy. Cerilo kan sinambit na banwaan nalamos sa Pinagpala Beach Resort sa Brgy. Balogo.


Sa kaparejong banwaan, si Christian Ador, 25 anyos kan Brgy, Caranan mantang nagmamaniho nin motorsiklo nakabudal sa kasabat na parejong sasakyan na pinagmamanijo ni Rico Tolentino kan San Andres Bukid, Metro Manila asin yaon na sa custodia kan Pasacao MPS. An insidente nangyari sa Zona uno Brgy. Caranan.


Sa insidente nin barangaan sa Santa Justina, Buhi, Camarines Sur an biktima si Raymundo Burana, 30 anyos taga Ciudad nin Pasig mantang nagmomotor sa Buhi, Camarines Sur nakabudal sa sarong Mitsubishi mirage na pigmamanijo ni Lea dela Justa 34 anyos, kan Mataurok, Minalabac, Camarines Sur.


Sa Caramoan, Camarines Sur binadil sa Barangay Bogcong an biktimang si Gerry Naa y Olibina, 23 anyos sa laog kan saindang residencia an MPS nagpapadagos pa an imbestigasyon sa caso kan Municipal Police Station.


Sa Ciudad nin Naga, si Jose Pagal, 47 anyos residente kan Barangay Lerma na dati nang suspechado sa panghahabon nin mga kable nin telcos nakua nang nakakabit sa linya asin nakabitay na mayo nin buhay. Nakasakat sa poste an biktima sa paagi kan truck kan SWMO asin sa imbestigasyon kan PNP, sinabi ni PSSG Tobias Bongon, opisyal na parataram kan NCPO nagpuputol nin kable an biktima kan makuryente asin ini dati nang nadakop kan PNP kan Noviembre 2022 sa kaparejong caso.


Sa Camarines Norte, sa inpormasyon kan PNP Provincial Office apat an mga binawian nin buhay matapos malamos na kinababalihan ninda Romeo Paragoda nalamos sa Candelaria Beach Resort sa Bagumbayan, Paracale, Camarines Norte; Ronald Navales nagkakarigos sa salog kan Brgy. Poblacion Norte, Paracale; Jose David Doma nalamos sa Kabagsaan, Capalonga; asin saro pang dai pa nginaranan.


Sa Matnog, Sorsogon naghabol pa kan Domingo, Abril 9, 2023 an sarong 62 anyos na bakasyonista nalamos kan malonod an sarong over loaded na baroto. Sinabi kan Provincial Disaster Risk Reduction Management Office an baroto lunad nin sarong familia na hali sa Manila nganing mag-island hopping na ilegal nagbibiyahe asin mayong permit sa Philippine Coast Guard asin tourist office.

Miembros kan Retrieval Team karga an saro sa anom na victima kan trahedya kan Sabado de Gloria. (MDRRMO San Jose, Camarines Sur)


Kinondenar kan Provincial Tourist Office, MDRRMO asin LGU an operator kan bangka huli sa kawaran nin permit.


Kan Abril 5, 2023, si PSSG Abel Sevilla tinambangan kan rebeldeng New Pepole’s Army sa sitio Agna kan Brgy. Homapon, Ciudad nin Legazpi. Hinabon pa si saiyang wallet, cellphone asin service firearm. Kinondenar kan Bicol an patraydor na pambabadil sa saindang katrabajo. Naenot na kaini si Pat Jan Julius Avillano kan Brgy. Sto. Domingo, Irosin, Sorsogon nagadan huli sa aksidente sa vehiculo kan Abril 1.


Saro pang insidente nin pagkakalamos sa Albay, an biktima pigbistong si Myril Broqueza Burgos, 21 anyos nagkakarigos sa quarry site alagad huri nang naaraman na nalamos. Siya residente kan Brgy. Lidong, Santo Domingo, Albay.


Sa Catanduanes sa listahan kan PDRRMO, saro man an pigsombong na binawian nin buhay matapos malamos sa Muraw Beach Resort, Brgy. Balongnonan, Pandan kan Abril 9, 2023. An biktima nginaranan na si Elmer del Valle, 52 anyos, nakua sa Palumbanes, Island, Caramoran.


Si BGen Westrimundo Obinque, regional director kan Bicol PNP nagpaluwas nin directiva sa mga provincial director asin unit commander na ipadagos an patrolya kan tourist police sa mga beach resort nganing magtabang sa pagpatanid sa magurang na dai pabayaan an saindang mga aki asin sa mga may edad na dai mag inom nin arak kun malangoy sa dagat. Afuera pa kaini, pagbantay sa mga pantalan, terminal, malls, simbahan asin iba pang mga lugar na parating pigtatawo. (dpa)



Comments


bottom of page