20% student fare discount sa bilog na semana asin holidays
An mga pampasajerong lunadan (PUV) obligado na magtaong diskuwento sa mga estudiante dawa aldaw nin Sabado, Domingo asin holidays alagad dapat naka-enrolled.

Ini an piglinaw kan Land Transportation Office (LTO) sa tahaw kan reclamo kan mga estudiantes apesar na naka-enrolled ngunian na school year.
Nagrereclamo man an mga tsuper huli kan padagos na paglangkaw kan produkto nin petrolyo iyo man an saindang dahilan sa pagsayuma sa diskuwento sa estudiantes.
Sa entrevista kan Bicol Mail ki Atty. Noreen San Luis-Lutey, Regional Director kan LTO Calabarzon saiyang sinabi na base sa Section 4, par 2 kan Acta Republica 11314 dawa mga aldaw nin Sabado, Domingo asin holidays dapat tawan diskuwento sa flete an mga estudiante.
An fare discount na tinatao sa irarum kan Acta Republica duman sana sa mga estudiantes na naka-enrolled, sabi pa.
An RA 11314 inaprubaran ni dating Presidente Rodrigo Duterte na midbid sa Student Fare Discount Act kabali an senior citizen, asin PWD dapat mag-isyu nin veinte porcientong diskuwento an arin man na Public Utility Vehicle (PUV). Kabali digdi sa jeep, bus, UV express, taxi, tricycle, MRT, LRT, maging sa mga viaje sa aire asin tubig.
An ibang senior citizen sa Ciudad nin Naga kaparejo man an reclamo sa pagsayuma na mag-isyu nin diskuwento an ibang mga tsuper.
Alagad kan mga nakaaging administrasyon poon pa kan 2005 igwa nang dating pig-iimplementar na 20 percent student fare discount na nagkaigwa man nin kaparejong reclamo an estudiantes.
Comments