BICOL SECTION
PS Andres hahagadon sa
NEA halion sa Casureco II
Nakaandam na an propuestong resolucion sa Sangguniang Panlungsod kan Ciudad nin Naga nganing isunad sa masunod na sesyon regular sa Martes, Enero 24 na huhuroton sa National Electrification Administration na ribayan sa puesto si Project Supervisor/Acting General Manager Orlando Andres kan Camarines Sur II Electric Cooperative (Casureco II), kun magpalpak pa an saiyang pangako na enterong veinte siete mga barangay kan ciudad masusuplayan na nin corriente sa Sabado, Enero 21 envez kan Enero 31.
Si Consejal Joselito Del Rosario, igwa nang draft resolution na enot nang pinaheling sa Bicol Mail asin nagkaperang miembros kan media antes magpuon an sesyon regular kan Martes, Enero 17 na saindang visita sa sesyon si PS/AGM Andres nganing hagadan nin paliwanag sa kamugtakan kan power restoration kan corriente.
Nareparo ni Bise Alcalde Nelson Legacion asin miembros kan SP an kawaran nin calamity preparedness plan kan manijamiento kan cooperativa mala ngani kapa-kapa sa power restoration matapos kan paglamasa ni bagyong ‘Nina’ sa Bikol.
Kan maglamasa sa Bikol si bagyong ‘Reming’, sampulong taon na an nakakaagi sa laog sana nin duwang semana na ibuelta an ‘’full restoration’’ sa ciudad, sabi pa kan bise alcalde.
An PS/AGM kan mag-atubang sa pig-iniciar na dialogue ni Alcalde John Bongat kan Lunes, Enero 16 na ginibo sa Villa Caceres Hotel nagcierto ini sa oficiales lokal, kapitanes de barangay asin iba pang mga sektor na sangatos por ciento nang ma-iilawan an enterong mga barangay kan ciudad sa Enero 21 bako nang Enero 31.
Sinabi ni Andres na saro na sana sa viente sieteng barangay kan ciudad an mayo pa nin suplay nin corriente na nag-asegurar kan sangatos por cientong power restoration sa ciudad.
Presente sa sinambit na dialogue iyo an General Manager kan Casureco I asin pamayo kan Bicol Electric Cooperative Association (BECA), Ana Sylvia Alsisto na pinadarang representante ni NEA Administrator Eduardo Masonson, mga miembros kan Sangguniang Panlungsod, asin iba pang sektores na nagtutuyaw sa bugolbolan na power restoration asin nagtaong mga suhestion asin plano nganing maparikas an rehabilitasyon matapos maglamasa sa Bikol si super typhoon Nina kan Diciembre 25, 2016.
Kan mag-atubang sa sesyon regular kan SP an PS/AGM nagkikibrada naman ini kan saiyang asegurasyon na sangatos por ciento pagbuelta kan corriente envez piglilinaw niya na kun si mga lugar na igwa pang raot an mga linya asin transformer dai pa mapapabulosan nin corriente hasta sa Enero 21 envez pueding aboton pa sa Enero 31.
Nagtindog si Consejal Del Rosario sa ginigibong sesyon nganing sabihan an PS/AGM na duda siya na dai marerealisar an pinapangakong sangatos por cientong energization mientras na igwa sanang 55 mga linemen kabale sa bilang an saindang supervisor asin mahale na an task force kapatid gikan sa ibang cooperativa nin electricidad na nagtatabang sa cooperativa sa power restoration.
Sinabi pa kan Casureco II na igwa pang sampulong mga transformer an raraot na asin pueding afectado an ibang lugar na dai aboton nin suplay nin corriente sa pigpangako kaini na Enero 21.
Pinatanidan kan consejal si Andres na igwa na siyang preparadong resolucion na isusunad sa masunod na sesyon regular alagad dai kaini pigdetalye envez si propuestong resolucion na hahagadon sa NEA na ribayan na an pamayo kan Casureco II.
Si Bise Alcalde Legacion, pamayo kan SP nagpasalamat sa naging presencia kan PS/AGM alagad hinahagad kaini na dapat maghaman nin plano sa pag-andam sa calamidad na enot na kaining pig-suhestion sa ginibong dialogue sa Villa Caceres Hotel.
An isyu sa power restoration sa Ciudad nin Naga iyo an pigtawan paliwanag kan cooperativa sa SP mientras na nagpapadagos pa an abalang rehabilitasyon sa iba pang coverage area.
DTI: Negociantes dai maging oportunista
An Department of Trade and Industry (DTI), nag-apelo sa mga establisimiento na dai maging oportunista an ibang mga pasaway na negociante sa paagi nin pagpalangkaw sa precio kan basic commodities mientras na yaon pa sa irarum kan estado nin calamidad an Camarines Sur matapos magrapado sa Bikol an bagyong ‘Nina’ kan Diciembre 25, 2016.
Si Jay Ablan, parataram kan DTI Camarines Sur nagsabi na malinaw na pagsinutil sa Price Act an arin man na negociante na magpalangkaw kan precio nin producto asin siisay man na madadakop pueding magmulta nin P5 mil sa premirong pagkakadakop sagcod na pasarahan an establisimiento kun padagos na masinutil.
Dapat ipasunod si dating precio antes kan paglamasa kan super typhoon alagad igwa nang nagsosombong contra sa ibang establismiento na nagpalangkaw na kan saindang precio matapos kan bagyo.
Kabale sa basic commodities iyo an mga delata siring kan gatas, sardinas, sabon, asukar, bagas asin pa pang producto na ginagamit aroaldaw.
An Capitolyo Provincial kan Camarines Sur tolos nagdeclara kan estado nin calamidad matapos kan paglamasa ni bagyong ‘Nina’ kan Diciembre 26 asin sakop digdi iyo an enterong municipalidades kan provincia asin Ciudad nin Iriga mientras suhay man na nagdeclara an Ciudad nin Naga na independiente sa Capitolyo Provincial.
Sinabi pa na masurprisang inspeksyon an DTI asin Naga City Price Coordinating Council na kabale digdi bilang miembros iyo an Department of Agriculture, National Food Authority, oficina kan tesorero kan Naga, Bureau of Fire Protection, asin Bureau of Foods.
Sinabi man ni kgd. Cydrid Ray-An Rentoy, pamayo kan NCPCC na nakarecibe na siyang sombong sa consumedores contra sa ibang oportunistang establisimiento asin ini saindang aaksyonan.
An reclamo kan ibang consumedores na dakul nang mga pasaway na establismiento alagad mayo pang nadadakop an DTI asin NCPCC.
An NFA Camarines Sur, sa paagi ni Assistant Provincial Manager Nora Follosco nagpatanid man sa mga NFA rice retailers na dapat dai magpalangkaw kan precio kan bagas kan agencia huli ta saindang babawion an saindang pig-isyung accreditation permit.
Pinako kan NFA an precio kan saindang bagas sa cantidad na P27 hasta P28 cada kilo. Saindang pigcierto na suficiente an saindang stock nin bagas sa bodega asin mayong peligro na magkulang an saindang pigsusuplay na bagas cada semana sa mga rice retailers.
Corriente sa Naga, 100% na sa Enero 21, sabi
Sa Sabado, Enero 21 iyo an pigtaong asegurasyon kan Camarines Sur II Electric Cooperative (Casureco II) na magiging sangatos por ciento na an suplay nin corriente sa veinte siete mga barangay kan Ciudad nin Naga mientras na sa iba pang coverage area kan cooperativa sa Enero 31, 2017.
Ini an resulta sa pinaapod na dialogue ni Alcalde John Bongat kan Ciudad nin Naga entre kan manijamiento kan Casureco II, National Electrification Administration, Liga ng mga Barangay, Metro Naga Chamber of Commerce and Industry, media asin iba pang sectores na nagrereclamo sa bagulbolan na power restoration kan cooperativa matapos kan bagyong ‘Nina’ kan Diciembre 25, 2016.
An LGU Naga matapos kan dakulang destroso kan calamidad nagmukna kan Operation Bangon Naga, alagad an problema iyo an abalang rehabilitasyon sa suplay nin corriente na saro sa aksyon kan jefe ejecutivo iyo an pagpa-apod nin dialogue na naging presente si BECA President asin GM Ana Sylvia Alsisto kan Casureco I na nagrepresentar sa NEA Administrator, Casureco II Project Supervisor/Acting General Manager Orlando Andres, ISD Manager Rolando Pante, asin iba pang mga sektor.
Sa pag-atubang ni PS/AGM Andres sa sinambit na dialogue kan Lunes, Enero 16 na ginibo sa Villa Caceres Hotel, nagcierto kan sangatos por cientong pagbuelta kan suplay nin corriente sa Enero 21 alagad nag-atubang siya nin mga tuyaw sa bagulbolan na power restoration asin suhestion nganing maparikas an rehabilitasyon asin dapat gibohon sa mga masunod na pag-andam sa paglamasa kan calamidad.
Nasa 88 por ciento na napabulosan nin suplay corriente sa ciudad mientras na sa ibang mga distrito na sakop kan cooperativa pigtalaan sa Enero 31, 2017 base sa orden kan Department of Energy.
Pigbabasol kan Casureco II si task force kapatid na gikan sa Manila Electric Cooperative (Meralco), Inc. na nagsasayumang magpasiring sa itaas na mga barangay kan ciudad siring kan Pacol, Panicuason asin Carolina nganing matapos tolos digdi an rehabilitasyon, alagad pigcontra ini ni Consejal Joselito Del Rosario huli ta nagsayumang mag-isyu nin job order an cooperativa nganing magpasiring sa upper barangay an grupo kan Meralco.
Hinahanap ni Del Rosario si Engr. Nelson Lalas kan NEA na destino sa Casureco II nganing hagadan nin paliwanag kun tano ta nagsasayumang mag-isyu nin job order, alagad an reclamo kan consejal pigninigaran ni Andres.
Nagkukulang nin command responsibility an Casureco II, frangkang sinabi kan consejal sa atubangan kan PS/AGM.
Nakatalaan mag-aprovetsar nin P36 milyon na calamity loan sa NEA mientras nagkaigwa sinda nin P80 milyon na daños, sabi pa ni Andres.
Sa resulta kan orolay, sinabi ni Alcalde Bongat mas marhay man giraray igwang representante sa junta directiva an ciudad nganing makatabang sa pagreparo sa saindang sakop na distrito arog kan problema sa power restoration, pagbugtak nin pusog o hararum na poste, paghale kan mga kahoy na nagiging dakulang perwisio kun may calamidad, dapat magkaigwa nin participasyon an Naga City Power Commission asin dapat maging parte an ciudad sa paghaman nin plano orog na sa lado nin calamity preparedness.
Sinabi man kan representante kan NEA dapat igwa mga pag-andam an cooperativa sa calamidad siring kan fondo sa rehabilitasyon, materyales asin dai na maglaom sa task force gikan sa ibang cooperativa huli ta inaabot nin labing sarong semana antes makaabot envez dapat maghanap na nin contractor nganing mapunan tolos asin maparikas an power restoration.
Comelec, zero pa sa nagpalistang SK
Nagluluwas na kadakle kan mga jovenes na nag-eedad 15 hasta 17 años dai interesado na mag-ayon sa organisasyon sa Sangguniang Kabataan nganing makaparticipar sa sarabay na Barangay asin SK elections sa Octubre 2017 mala ngani haros zero pa aroaldaw sa sainda an nagpapasiring sa Comelec nganing magpalista bilang votantes.
Si Abogado Maico Julia Jr. Election Officer kan Commission on Election sa Ciudad nin Naga nagpahayag na ini an pulso sa kadakle sa mga magurang na nagpapa-rehistro sa saindang oficina.
Puon kan Noviembre 7 hasta Diciembre 31, 2016 igwa nang nagpalistang 1,600 alagad haros 90 por ciento sa sainda may edad na asin senior citizens.
Nagdakul man an numero kan nagpapalistang senior citizens mientras na saro sa rekisitos sa Office of Senior Citizens sa City Hall nganing ma-isyuhan nin Sr. Citizens ID dapat rehistradong votante kan ciudad. Base sa SK Reform Act, an 15 hasta 17 años pueding maka-voto sa SK election alagad dai pueding votohon o dai pueding macacandidato sa arin man na posisyon kan saindang organisasyon.
An ley nagsasabi na an rehistradong SK na nag-eedad nin 18 hasta 24 años iyo sana an calificado na macacandidato mientras na iginilid na si menor de edad na magpugol nin ano man na posisyon.
Sa lomang ley kan SK an mga nag-eedad nin 15 hasta 17 años calificado na magcandidato sa arin man na posisyon alagad sa enmiendadong SK Reform Act dai na sinda tinutugotan.
Nagsikad an pagpalista kan mga calificadong votantes sa Comelec kan Noviembre 7, 2016 asin matatapos sa Abril 27, 2017.
Halawig si vacacion kan jovenes kan nakaaging Diciembre 2016 hasta Enero 2017 sagcod na nagkakaigwa nin mga satellite registration sa barangay alagad mayong nagpapalistang jovenes envez si mga transferee asin si bagohan na votantes para sa pigtalaan na sarabay na Barangay asin SK elections. An sinambit na pirilian dapat gibohon kan Octubre 2016 alagad inuktaba kan congreso mientras na natatapos pa sana si national asin local elections kan Mayo 9, 2016.
132 na brgy sa CSur salbado na sa droga
Matapos kan anom na bulan na guierra laban sa droga kan PNP Camarines Sur, 132 sa 163 na afectadong mga barangay kan ilegal na actividad an declarado na bilang drug cleared barangay. Ini base sa sinumiter na report kan Philippine Drug Enforcement Agency (PDEA) sa PNP Provincial Office sa magkatuwang nindang operasyon laban sa droga puon kan Julio1 hasta Diciembre 31, 2016. Alagad sinabi ni Chief Inspector Errol Garchitorena, Jr. jefe kan Police Community Relation (PCR) kan PNP CamSur sa saindang listahan maabot sa 400 sa 1,006 na barangay kan provincia an afectado kan ilegal na droga.
Nagsakat man sa viente saes mil an nagsuroko sa awtoridad na mga envuelto sa droga mientras ngonian na 2017 nagpapadagos pa an saindang campaña asin igwa pang nagkakadarakop sa mga ginigibong buy bust operation kan manlaen-laen na Municipal Police Station.
Dawa declarado na an 132 mga barangay bilang drug cleared alagad nagpapadagos pa an pagsubaybay kan mga awtoridad asin miembros kan Barangay Anti-Drug Abuse Council (BADAC) nganing macierto na malinig na an lugar sa ilegal na droga.
Afuera pa kaini, saindang pigserne si listahan kan PDEA na hinale si dai man existidong barangay.
Piglinaw pa kan PNP CamSur na igwa sindang ginagamit na parametro antes ideclara an sarong barangay na libredo na sa ilegal na droga asin enterong pigseserne kan BADAC, PNP, PDEA antes pinalmenteng pirmahan kan alcalde .
Puon ngonian na Enero 2017 nagpapadagos pa an saindang operasyon sa double barrel parte kan saindang clearing operation sa mga barangay orog na si nasa irarum kan drug cleared barangay.
Sinabi pa na igwa pa sindang gigibohon na operasyon nganing mapahiwas pa an guierra laban sa droga asin maglangkaw an saindang acomplisimiento kasunod kan higot na directiva kan saindang higher command.