BICOL SECTION

SA CASURECO III Lakma na sa P1-B na utang Ciudad nin Iriga – Enterong lakma sa pagkaka-utang an manijamiento kan Camarines Sur III Electric Cooperative (Casureco III) sa Rinconada area na nagsakat na sa P1 bilyon kun itatampad sa mga moroso kan miembro-consumedores na dapat colectahon nag-aabot sana sa P143 milyon. Afuera pa kaini, maluyahon an power restoration matapos maglamasa sa Bikol si bagyong ‘Nina’, abot pa sana sa setenta por ciento an napapabulosan nin suplay nin corriente kadakle sa centrong barangay alagad igwa pang nawawalat na setentang mga barangay na iyo ngonian an tinatawan prioridad kan bagong manijamiento sa paagi kan Task Force Duterte Rinconada Power na pinadara kan National Electrification Administration (NEA). An task force pinamamayohan ni Cesar Faeldon na iyo an designadong Project Supervisor asin an Interim Board na pinamamayohan ni Casureco I General Manager Ana Sylvia M. Alsisto, nagtutukaw bilang chairman, co-chairman si Casureco IV GM Veronica Briones, an mga miembros kinababalehan ninda Padre Rey Caceres hale sa religious sector; Wilbur Almoneda hale sa civic sector; Persius Cheng kan business sector asin GM Victor Cada kan Quezon II Electric Cooperative. Niribayan kan interim board si mga elihidong director na pinamamayohan ni Board President Gilbert Villar, an aksyon kan NEA pigdadahilan na dai napapadalagan nin toltol kan junta an manijamiento alagad nagrereclamo an dating junta na bako sinda an dapat basulon envez an namamayo kaini. Si Faeldon, nag-asumir bilang Project Supervisor kan Febrero 3 asin kan Martes, Febrero 7 nagkaigwa nin premirong miting an interim board na saindang nadiscobre an bilyon pesos na pagkaka-utang kabale na digdi si babayadan sa power supplier asin dai pa nababayadan na nagretiro nang mga empleado sa serbisyo. Inabot nin limang oras an premirong miting kan junta na saindang tatawan nin prioridad iyo an power restoration sa dakul pang mga barangay na sagcod sa ngonian mayo pa nin suplay nin corriente dawa na ngani nagtabang sa cooperativa an Task Force Kapatid. Hinagad na kan interim board sa Task Force Kapatid na ipadagos ninda an pagtabang sa rehabilitasyon kan mga poste asin linya hasta sa Febrero 16 alagad sa anom na cooperativa nin electricidad na nagtatabang sa power restoration tolo na sana an nawalat. Sa pag-aadal pa ninda kan kamugtakan kan cooperativa, sinabi pa kan informante kan Bicol Mail na igwa kapabayaan an mga nakaaging manijamiento alagad nangyayari ini huli kan permi na sanang nagriribay nin OIC General Manager asin Project Supervisor. Resulta kaini, dai na ipapadagos an mga hinaman na programa na dai na lugod nin estabilidad an pagpadalagan kan ruro nang kamugtakan na cooperativa. P205M WINALAT NA DAÑOS NI ‘NINA’ Ini an pigsumiter na listahan kan Casureco III sa NEA alagad an task force Duterte pigririkisa an damage report huli kan dakulang cantidad. An dakulang destroso kan nakaaging calamidad iyo an pigdadahilan kan manijamiento kun tano ta abalahon an power restoration. Nag-uutang nin P20 milyon na calamity loan alagad an task force hahagadon sa NEA na dagdagan an sinambit na cantidad nganing makatabang sa gagamiton na fondo sa rehabilitasyon. Sinabi pa na mawot kan interim board na dai padificilan an pagbakal nin materiales nganing dai makaulang sa rehabilitasyon. MGA KALUYAHAN KAN MANIJAMIENTO Sinabi pa na an kakulangan asin napapabayaan kan cooperativa naheling kan task force sa lado technical, finance asin education na kabale sa saindang tatawan nin atensyon sa iimplementar na mga reforma. An miembro-consumedores digdi dati nang nagdedenuncia sa kamugtakan kan manijamiento dai pa nagkakaigwa nin calamidad asin kabale sa mga binabasul iyo an pakikiaraman kan nagkaperang pulitico sa Rinconada kan mga nakaaging taon sagcod na dagos-dagos nang dai nakakabangon Nag-init an isyu kaidto sa privatization alagad dai nangyari matapos dai tugotan kan NEA. MAGTARABANGAN Ini an apelo kan task force sa mga empleados mientras na sinugo sana sinda kan NEA na magtabang nganing mapakarhay an cooperativa. An cooperasyon dakulang bagay mientras na an makikinabang kaini iyo an rinibong consumedores na nagmamawot nin reforma, sabi pa. Sakop kan Casureco III iyo an Ciudad nin Iriga, Bula, Bato, Balatan, Buhi asin Nabua. Peace talk dapat pulidohon - NDF Kun binasura na ni Presidente Rodrigo Duterte an unilateral ceasefire alagad an National Democratic Front (NDF) sa Bikol nagpahayag man na dapat pulidohon asin parikason kan GRP Panel an mga kasundoan sa orolay pang katuninongan. Sa pinaluwas na pahayag sa prensa kan NDF sinda nagtutubod na dai pa sarado an unilateral ceasefire mantang mayo pa sinda nakakarecibe nin pormal na notice or termination. Nanindugan pa na dapat palibrehon na an maabot sa 400 na mga presonero pulitical na may mga edad na asin igwa nang kamatean sa salud, dapat maging sincero asin ipasunod an nahaman na agenda kan mag-ibong na lado orog na an isyu sa mga nangyayaring pagbalga sa deretsong pantawo. Saindang pigrereclamo an mga ginigibo pagpa-apod kan militar sa residentes kan mga barangay asin sinusunad sa interogasyon na sarong pang-sasabotaje kan AFP sa orolay pang katuninongan. Dai matapos-tapos an isyu sa militarisasyon na iyo pa an saindang pigrereclamo sa tahaw kan unilateral ceasefire, paggamit kan Barangay Hall, Day Care Center asin escuelahan arog kan mga nangyayari sa banwaan nin Dimasalang asin Cawayan sa Masbate, Matnog, Sorsogon, Bulan Sorsogon, sa Labo, Capalonga asin Jose Panganiban sa Camarines Norte asin Ragay, Lupi asin Del Gallego sa Camarines Sur. An sinambit na isyu nagpapaheling nin insinseridad an AFP, GAP na kun haen an katutoanan an nangyayaring militarisasyon nakatago sa irarum kan peace and development alagad ini counter insurgency program kan gobierno na an naiipit asin lugi iyo an namamanuan na nagreresulta sa pag-gadan, paglikidar kan namamanuan asin malalang pagbalga sa deretsong pantawo dawa mayong unilateral ceasefire. Sinabi pa na dapat ipadagos an orolay pang katuninongan, dai dapat ini maging ulang o pagputol sa orolay sa peace talk asin kaipuhan orolayan an mga problema kan namamanuan kan mga nagiging dahilan kan armadong labanan sa Filipinas. An pagbasura kan presidente sa peace talk kasunod kan nangyaring pang-aatake kan NPA sa mga soldados kan gobierno sa Mindanao na mayong kalaban-laban asin bako nang makatubod-tubod na mga condisyon. Mga paraoma hinasa sa natural farming An teknologiya sa natural farming iyo an pigtatawan nin prioridad kan Committee on Agriculture kan Sangguniang Panlungsod asin kan City Agriculturist kan City Hall nganing matabangan an sektor nin paraoma sa ciudad na mapa-asenso an saindang pagbuhay. An komite na pinamamayohan ni Consejal Julian Lavadia Jr. pigtiripon an grupo nin paraoma na kadakle gikan sa itaas na mga barangay kan ciudad nganing matukdoan kan mga bagong teknologiya sa paagi kan ginibong duwang aldaw na seminar na may titulong ‘An Armas sa Pag-asenso kan Paraoma iyo an natural farming’, An sistema na uyon sa klima kan satong lugar’. Si Lavadia asin City Agriculturist Edna Bongalonta nagpahayag na panahon nang magkaigwa sinda nin dagdag na kaaraman na tipid sa gastos sa paagi kan organikong pag-oma na maresulta sa halangkaw na produksyon. An seminar ginibo sa Blue Room kan City Hall kan Febrero 6, 7 na an veterano asin paratukdo sa ngaran na natural farming, Andry Lim kan Ciudad nin Davao iyo an naghasa sa mga participantes nganing ma-implementar an bagong teknolohiya sa organikong pag-oma na bakong magastos sa bulsa kan paraoma. Kabale sa pigtukdo asin nahasa an mga participanteng paraoma iyo an pagproducer nin sadiring abono, pang-spray sa mga insekto sa paroy asin mga tinanum na gulayon, mga formula sa pagpataba asin pagpa-dakula nin mga ataman na hayop asin iba pang estratihiya na makakatabang sa sektor nin paraoma. Nagtutubod an consejal na matapos kan seminar magkakaigwa nin marhay na bonga para mapa-asenso an sektor na ini sa paagi kan simpleng mga ideya sa pagtanum asin pag-ataman hayop alagad makakatabang sa halangkaw na produksyon. An itaas na mga barangay kan ciudad kinababalehan kan Pacol, Carolina, San Isidro, Panicuason asin Cararayan na yaon digdi an natatada pang 750 hectarya kaomahan sa dating 1,500. Supt. Adan, nagtutukaw

OIC PD sa Camarines Sur Si Supt. Joel Adan, iyo an nagtutukaw na OIC Provincial Director kan PNP Provincial Office kan Camarines Sur karibay ni P/Sr. Supt. Walfredo Pornillos na nagtapos na kan saiyang duwang taon bilang pamayo kan PPO digdi asin destino na sa Camp Semion Ola sa Ciudad nin Legaspi. Sinabi ni Regional Director Chief Supt. Melvin Buenafe na saiya munang pinatukaw na OIC PD si Adan matapos bawion kan Campo Crame an orden ki P/Sr. Nestor Tiempo na iyo kuta an maribay ki Pornillos sa pigtalaan na turn over of command kan Miercules, Febrero 8, 2017. Dai pigdetalye kan Campo Crame an directiva na binabawi an bagong destino ni Tiempo mientras na nagsusunod sana kami sa orden, sabi pa ni Buenafe. Si Pornillos kaipuhan nang magpugol nin posisyon sa oficina rehiyonal kan PNP nganing magsakat an saiyang ranggo asin natapos naman kaini an maximum na duwang taon bilang provincial director. Pigtutubodan na igwang pulitico sa provincia an nag-ulang sa pagpatukaw sa bagong PD alagad nagsayumang magkumpirmar an Bikol PNP. Kan panahon kan dating provincial director halangkaw an saiyang acomplisimiento sa guierra laban sa ilegal na droga na kun haen natawan siya nin reconosimiento kan Bikol PNP. Mientras tanto, sinabi pa kan Bikol PNP matapos tunawon na kan higher command an Anti-Illegal Drug Group an miembros kan PNP padagos man giraray na magsusuporta sa campaña kan Philippine Drug Enforcement Agency (PDEA) sa mga operasyon kaini laban sa droga.