Col. Pastrana, bagong jefe kan battalion sa CAFGU


Pili Camarines Sur - ‘‘May tiwala ako saindo bilang mga oficial kan 9th Infantry Division kan Phil Army”, ini an mensaje ni Major General Manolito Orense, bilang pamayo sa turn over of Command Ceremony sa 22nd Infantry ‘Valor Batallion o mas bistado sa apod na CAFGU Batallion. Si Col. Mike Buhat, niribayan ni Col. Joselito Pastrana bilang Battalion Commander kan Cafgu Battalion mientras na tinawan man nin Military Merit Medal bilang pagmidmid kan siyang mga acomplisimiento sa misyon kan Cafgu. Kabale digdi an pagdisiplina sa gabos na miembros kan battalion kan yaon sa Kabikolan asin mga banwaan kan Tagkawayan asin Calauag sa provincia kan Quezon. Naging activo man an official sa pag participar sa Bloodletting program kan Red Cross asin pag-distribuir kan Kabuhayan kit kan Department of Labor and Employment sa mga residentes na yaon sa mga puwerang lugar. Si Col. Buhat, nag-asumir sa pagiging battalion commander kan Abril 16,2016 bago siya niribayan asin ibinalyo bilang pamayo kan Governance and Strategic Management Office kan 9th ID kan Philippine Army. Idinagdag pa ni MGen Orense na an bagong posisyon ni Col Buhat makakatabang sa tinutolof na Army Transformation program sa Division level. Puwede man ining maging liyabe para maka–okupar nin puwesto sa Brigade asin maging Heneral. Si Col Pastranana dating pamayo kan Civil Military Office , 42nd Infantry Batallion na parehong natawan award bilang Best battalion sa intirong nasyon bago siya na ilipatsa 65th infantry battalion na nakakasakop sa Zamboanga Peninsula, nagtutubod na an saiyang eksperiencia sa nasabing mga oficina an makakatabang na marhay bilang pamayo kan CAFGU Batallion. Hinagad man kaini an suporta kan saiyang mga bagong tauhan para mai-implementar an mga programa sa Batallion. Mientras tanto, huli sa marhay na performance kan duwang oficial, dakula an paglaom ni MGen Orense bilang Division commander kan 9th infantry division kan Phil. Army na padagos na magiging matuninong na rehiyon ang Kabikolan.(Melvin Machado)