Iredong suldados sinungko sa hospital kan pamayo kan 9th ID

Pili Camarines Sur Siring sa sarong ama na nagpapadangat sa saiyang aki, sinungko sa hospital ni Major Gen. Manolito Orense, pamayo kan 9th Infantry Division kan Phil Army sa Bikol an suldados na si Cpl. Mark Alfred Repol na nairido sa nangyaring encuentro kan nakalihis na petsa saes kan presenteng bulan sa Sitio Batolinao, Barangay Amutag Aroroy Masbate. Tolos sinugo kan pamayo kan 9th ID na madara digdi sa Ciudad nin Naga si Cpl Repol para mas maatendiran kan mga doctor an sinapong tama bago desisyunan an pag airlift kaini pasiring sa military hospital sa Metro Manila. Isinabay kan halangkaw na official kan militar sa Bikol an pagbisita sa compleaño kan suldados na napaluha kan itakod saiya an Wounded Personnel Medal asin cash na puwedeng makatabang sa ibang gastuson kan familia. Huli ta comple-año kan corporal, may dara man an grupo kan heneral nin cake, frutas asin kinantahan ini nin birthday song na sobrang ikina ogma kan suldados na binabantayan kan saiyang familia. Susog pa saiya, obligasyon nindang itao an kaipuhan na tabang sa mga suldados na nalulugadan o nadidisgrasya sa pag-utob kan saindang sinumpaan sa serbisyo. May fundo an Phil Army na pinag kukuanan nin pang-tabang sa saindang mga tauhan. Afuera kan finansyal na tabang, may mga bago man na kagamitan an mga suldados na yaon sa frontline na nakikilaban sa mga rebelde arog kan bagong badil asin mga sasakyan. Siniguro kan liderato kan 9th ID na maski yaon sinda sa headquarter, suportado ninda an gabos na kaipuhan kan saindang mga suldados para sa mas efectibong pagpapasunod kan saindang mandato na maging matuninong an kabikolan. (Melvin Machado)