Mayong parakuang aki, NCPO may itutogang sekreto sa SP

Isinikwal na kan Naga City Police Office an isyu sa nagkaperang incidente nin pandudukot nin menor de edad na aking lalake sa Ciudad nin Naga, alagad igwang sekreto na habong iluwas sa publico sa paagi nin media maging sa bukas na sesyon regular kan Sangguniang Panlungsod envez itutoga an tunay na isyu sa paagi nin executive session sa SP. Si Deputy City Director for Administration P/Supt. Eugenio Manondo nagkumfirmar sa sesyon regular kan Sangguniang Panlungsod kan Martes, Febrero 14 na igwang pig-osip sa Police Station 2 na suboot otso años na aking lalake na dinukot nin nagkaperang kalalakihan kan Enero 21 sa Doña Clara Subdivision, Concepcion Pequeña asin kan Enero 26 saro naman na quince años na aking lalaki an dinukot sa Panganiban Drive sa Rotonda area kataid kan Police Station 2. Alagad sa ginibong investigasyon kan NCPO, sagcod na hinapot an mga magurang o sadiring tawo kan sinasabing mga victima nagluwas na mayong katotohanan an mga nagluwas na informacion sa social media. ‘’it is now safe to say that NO ABDUCTION transpired in the City of Naga. We wish therefore to inform all the Nagueños that Naga is still and always be ‘An MAOGMANG LUGAR.’ – NCPO, City Director P/Supt. Julius Munez, base sa press release ni CD Munez na binasa sa Session Hall ni SPO2 Tobias Bongon. Nagsayuma nang magdetalye sa miembros kan Sangguniang Panlungsod an NCPO mientras na saindang mantenido na dapat ‘confidential’ an investigation report huli ta an puede sana kaining magpaluwas iyo si CD Munez sa paagi kan executive session kan SP na pinamamayohan ni Bise Alcalde Nelson Legacion. An City Director nakatalaan padarahan nin formal na invitacion kan SP nganing mag-atubang sa executive session kan SP sa maabot na Febrero 21. Si P/Supt. Manondo naging visita sa sesyon kan SP sa kahagadan ni Consejal Julian Lavadia Jr. nganing linawon an mga nagluwas na informacion sa paagi nin social media sa mga incidente nin pandudukot nin aki na nag-eedad nin otso hasta quince años. Sinabi man ni Consejal Elmer Baldemoro, Chairman kan Committee on Children na kun nagkaigwa man nin isyu sa pandudukot nin aki naging alertado na an mga magurang sa Ciudad nin Naga mala ngani ‘’super bantay’’ sa paghatud asin sundo sa escuelahan. ‘An estorya sa parakuang aki, suanoy nang estorya mala ngani aki pa ko igwa na kaining mga patanid’’, sabi man ni Consejal Joselito del Rosario. (DPA)