Brgy. dai na mapapara sa mapa kan Calabanga

An Barangay Belen na posibleng mapara sa mapa kan Calabanga, Camarines Sur na may hiwas nin setenta y seite (77) hektarya saro sa tolong mga barangay digdi na nasa gilid kan dagat na nagpaparasadit an lugar mala ngani kinakan na an apat na hektaryang kaomahan kan makusog na tubig dagat kan bagyong ‘Glenda’’ duwang taon na an nakakaagi. Alagad kan maglamasa sa Bikol si bagyong ‘Nina’ naprobaran na dakulang bagay si pinaconstruhir na seawall ni dating Congresista asin ngonian Bise Presidente Leni Robredo, sabi sa Bicol Mail ni Brgy. Kapitan Alvin David kan sinambit na barangay. An barangay igwang 360 na mga harong, 378 familia asin may total na 1,205 populasyon na kadakle nabubuhay sa pag-oma alagad na-inaan pa sinda nin apat na hektarya kaomahan na sadiri kan tolong familia na kabale sa na-ngaranan iyo an familia Alarcon asin David. Sa laog sana nin tolong taon sa puesto ni Robredo bilang congresista kan tercer distrito kan Camarines Sur narealisar an multi-million pesos na proyecto na dakulang bagay sa contituentes kan samong barangay, sabi pa ni David. Kabale sa nabugtakan nin seawall iyo an Barangay Sabang asin sinabay na si pagbugtak nin Sabang Fishing Port. Sinabi man ni Brgy. Kapitan Levy Santa Ana Kan Barangay Sabang na saro man sinda sa nakinabang kan proyecto sa seawall kan bise presidente asin sa saiyang osipon puon sa Ilawog sundo sa centro kan saindang barangay abot sa sarong kilometro an afectado na parating kinakakan an daga kun makusog an tubig dagat orog na kun nagkakaigwang calamidad na nagreresulta man sa pagsadit kan saindang lugar. Afuera kan sinambit na proyecto na nahaman kan congresista pa si VP Robredo, dakulang bagay an Fishing Port sa barangay, sabi pa ni Kapitan Santa Ana. SEAWALL TABANG VS BAHA, ILLEGAL QUARRYING PIGRERECLAMO An saro pang lugar iyo an Barangay Sibobo, kan nakaaging bagyong ‘Nina’ sinabi ni Brgy. Kapitan Edgar Sargento na nakahawas man sinda sa pagkatakot kun may calamidad. Nakatabang an seawall nganing maulang an makusog na mga pagbaha alagad igwa man karibay nin problema mientras na an tubig baha gikan na sa bukid kan saindang lugar huli sa illegal quarrying. Pigrereclamo kan comunidad iyo an padagos na ilegal na actividad sa bukid na dai masitar kan Brgy. Kapitan sa dahilan na an envueltong persona dayupot sa halangkaw na oficial kan Capitolio Provincial. Afectado kan ilegal na actividad sa bukid iyo an zona cinco dawa mayo nin calamidad nagbabaha mientras na natahuban na si sapa na agihan nin tubig hale sa bukid pasiring sa dagat. Hinagad ninda an aksyon kan gobierno particularmente ni DENR Secretary Regina Pas Lopez na ipapundo an ilegal na actividad huli ta kun padagos na papabayaan kan saindang lider mauubos na an bukid na afectado sa tubig baha iyo an residentes kan barangay. Inosip na kan mga residentes asin kan Brgy Kapitan ki Bise Presidente Robredo nganing ipaabot ki Secretary Lopez.