Mt. Isarog raraoton kan mini-hydro



An Protected Area Management Bureau (PAMB) na nangangataman kan kapalibotan kan Bukid Isarog alagad iyo an nagtugot sa Clean and Green Energy Solutions Inc. nganing iconstruhir digdi an P150 milyon na Rangas River Mini Hydro Power Plant sa pamitisan kan bukid. Natutuyawan kan mga environmentalist an proyecto mientras na raraoton an bukid na bubugtakan nin tinampo hale sa ibaba pasakat sa lugar kan mini-hydro asin maputol nin mga kahoy na malinaw na pagbalga sa Republic Act No. 7586 na mas midmid sa National Integrated Protected Areas System of 1992, na estrictong nagbabawal sa ano man na actividades sa laog kan parke nacional. Si Francis Badiong, Project Area Manager nagpahayag sa entrevista kan Bicol Mail na afuera kan PAMB an grupo kan indigenous people asin Barangay Council kan San Pedro, (dating Brgy. Aroro), Goa, Camarines Sur pinapaboran an mini hydro mientras labi sa 200 an matatawan nin trabajo asin mapabakal an compaña mas baratong presyo nin suplay kan corriente sa Camarines Sur IV Electric Cooperative (Casureco IV). Alagad natutuyawan kan mga environmentalist an proyecto mientras na raraoton an bukid na aagihan kan access road asin maputol nin mga kakahoyan. Naging cuestionable pa apesar na an permiso sa Brgy. San Pedro, alagad namumugtak sa Brgy. Katagbakan. Sinabi man ni Badiong na bako man an enterong 1.2 hektaryang proyecto kan mini-hydro an yaon sa laog kan protected area kan Bukid Isarog envez nakalaog sana sa 200 metros mantang nasa pamitisan sana an proyecto. Igwang kagabsan na 3.8 hectarya an proyecto kabale na an icoconstruhir na tinampo asin 77 sanang mga kahoy an saindang puputolon mientras na igwa man ining karibay sa paagi nin mga tree planting sa bukid. An resolucion numerado 05 hinaman kan PAMB kan Agosto 7, 2015 asin aprobado ni dating DENR Regional Director Gilbert Gonzales, igwang endorsement an Brgy. Council kan San Pedro, Sangguniang Bayan kan Goa asin Partido Development Administration (PDA) kan Marso 2009. Kabale pa sa saindang documentos iyo an Environmental Compliance Certificate na pirmado ni Director Gonzales kan Noviembre 2009. Alagad nagpaso na an limang taon na ECC permit asin an bagay na ini kinumpirmar kan DENR Bikol. Sinabi pa kan project area manager na nagsusunod sinda sa orden kan DENR mientras na yaon na sinda sa proceso kan bagong ECC nganing ipadagos an proyecto na mapapakinabangan sa laog nin viente cinco años. Igwa na kaming purchase agreement sa Casureco IV na mapabakal sinda nin mas hababang presyo kan corriente kun itatampad sa ibang power supplier kan cooperativa na an efecto kaini mababa man an singil kan cooperativa sa consumo nin corriente kan miembros-consumedores, sabi pa. An proyecto kan Clean and Green Solutions Inc., maproducer nin 1.5 megawatt an mini-hydro asin an contractor iyo an Pacific Summit Construction Group na pinapundo na muna kan saindang construccion mantang pendiente pa an bagong ECC. Si Bernardo San Juan, miembro kan indigenous people asin dating pamayo kan Mt. Isarog Guardian iyo na an liason officer kan Clean and Green Solutions asin saro sa saiyang trabajo iyo an pakikipag-negociar sa mga kagsadiri nin lote na pigtutukdokan kan mini-hydro. Saiyang pigribayan si Oscar Lim na ngonian miembro na kan Sangguniang Bayan. (DPA)