Pagpahiwas kan mga nat’l road sa Naga fofondohan sa 2018

An Department of Public Works and Highways (DPWH) sa Bikol nagtao na nin asegurasyon sa mga oficiales lokal kan City Hall na makakabale na sa tatagamahan nin fondo sa 2018 iyo an mga road widening sa Maharlika Highway kabale an Villanueva Avenue, dating Liboton St. gabos sa Ciudad nin Naga. Ini an bonga kan pakikipag-hampangan ninda Bise Alcalde Nelson Legacion asin Consejal Vidal Castillo ki DPWH Regional Director Reynaldo Tagudando sa Ciudad nin Legaspi, kaibanan si DE Rebbeca Roces asin ADE Richard Ragrario dai palang nahahaloy sa tahaw kan kamawotan kan ciudad na dapat marealisar na an pagpahiwas kan mga mayor na tinampo mientras na padagos na naghihibog an trafico sa Ciudad nin Naga, na iyo an commercial center digdi sa Bikol. Kinumpirmar ninda Legacion asin Castillo na mismo an pamayo kan obras publico nagcierto na kabale na sa saindang listahan nin mga proyecto sa masunod na taon sa rehiyon cinco isusumiter sa oficina ni Secretary Mark Villar an mga road widening kan Maharlika Highway sa Concepcion Pequeña, Grande, Del Rosario sundo sa linderos kan Pili, Camarines Sur asin Diversion road, Tabuco asin Mabolo sundo sa linderos kan Naga asin Milaor. An Villanueva Ave., na igwang naenot na presupuesto an DPWH alagad nagreclamo si Consejal Castillo na pig-re aligned si fondo kan 2nd Engineering District kan DPWH sa Baras, Canaman, Camarines Sur sa dahilan na dai aram ninda na an sinambit na tinampo sarong national road. Si Castillo, pamayo kan Committee on Infrastructure sa Sangguniang Panlungsod nagsabi na dapat tawan nin prioridad kan DPWH na ma-implementar na an road widening kan Villanueva Ave. mantang ginatos nang mga vehiculo an nag-aagi digdi aroaldaw bako lang gikan sa laog kan ciudad envez hale pa sa mga banwaan nin Tinambac, Calabanga, Bombon, Magarao asin Canaman, kaya ngani kaayon na sa presupuesto kan agencia sa 2018. An consejal iyo an padreno kan resolucion sa SP na hinahagad ki DPWH Secretary Villar na iconverter na sa national road an mga city road kan Balatas, Cararayan, San Isidro, Carolina asin Bagumbayan Sur hasta sa linderos kan Camaligan, Camarines Sur. Makakatipid nin milyones pesos na fondo sa infrastraktura an City Hall kun marealisar an proyecto, sabi pa ni Castillo. An conversion maagi sa lehislasyon sa duwang camara na padreno sinda Congresista Gabby Bordado kan tercer distrito kan CamSur asin Senador Bam Aquino. (DPA)