RESULTA SA CONSULTASYON: Death penalty bill isinisikwal sa tercer distrito kan CamSur

Mayoria kan mga constituentes sa tercer distrito kan Camarines Sur nagcocontra sa pigtutulod ni Presidente Rodrigo Duterte na ibuelta kan congreso an castigong bitay sa mga makangirat na krimen . Si dating Alcalde Abang Mabulo kan San Fernando, CamSur asin Chief of Staff ni Congresista Gabby Bordado nagsabi na an representante kan tercer distrito nagconducir nin mga consultasyon sa manlaen-laen na sektores sa laog nin duwang semana asin an resulta nagpapaboran na dapat isikwal kan congreso an House Bill 4727 na nagtulod na buhayon an death penalty sa nacion. ‘’An satuyang congresista nanindugan base sa saiyang paghapot sa pagconsulta sa saiyang consituentes sa paglibot sa laog nin duwang semana nganing maatid-atid niya an pagmate kan saiyang kahimanwa, saiyang nadiscobre na 80 por ciento contra sa pagbuelta kan death penalty’’ Kabale sa saiyang mga pigconsulta iyo an senior citizens, kababaehan, jovenes, paratukdo, paraoma, kapitanes de barangay asin iba pang sektor. Gulpi an naogma huli ta sabi ninda ngonian sinda nakamate na an saindang congresista hinahapot sinda kun ano an saindang panindugan sa mga isyu na saiyang ipinaglalaban. Gustong sabihon ‘’pro life’’ an mga taga tercer distrito kan CamSur, sabi pa ni Mabulo. Bilang congresista, saiyang papanindugan kun ano an gusto kan mga tawo sa saiyang distrito, bakong personal an saiyang desisyon envez bilang representante kan tawo. Saiyang ipinaglalaban duman sa congreso an panindugan kan namamanuan na saiyang pigrere-presentaran. An death penalty bill padagos pang pigdedebatehan sa congreso na sakop sa bill iyo an mga caso sa treason, piracy, bribery, parricide, murder, rape, kidnapping, illegal detention, robbery, destructive arson asin sa ilegal na droga alagad hinale na an plunder case na kadakle envuelto digdi si mga kuraptong oficial kan gobierno. An Filipinas igwang international treaties na may kasundoan na hinahale ta an death penalty, ini si kadaklan na advance countries na tinanggal na an sinambit na penalidad. Sabi ninda dapat isikwal na an castigong bitay na inaprobaran sa Oslo Norway. Kan nakaaging Miercules nin Pangurus (ask Wednesday), pagpuon kan kuaresma, dakul an nagpasiring sa mga simbahan sa Via Crusis na sulot an t-shirt na itom na nakalaag contra sa EJK o extra judicial killing asin death penalty. (DPA)