Task force bibilogon kan SP vs HIV/AIDS

Nakasunad na sa Sangguniang Panlungsod kan Ciudad nin Naga an propuestong ordinansa na mabilog nin task force na iyo an ma-monitor kan mga caso sa Human Immunodeficiency Virus/Acquired Immunodeficiency Syndrome (HIV/AIDS) asin Sexually Transmitted Diseases (STD) huli kan padagos na paglangkaw kan caso kaini. Si Consejal Sonny Rañola, pamayo kan Committee on Health iyo an nagpapadreno kan ordinansa na pigpunan nang tukaron sa regular session kan Martes, Febrero 28 asin yaon na sa committee level. Katuyohan kan consejal nganing macierto an proteksyon sa mga menor de edad na kaakian contra sa HIV/AIDS na posibleng maging envuelto sa amay na pakikipag-sex. An Department of Health asin an City Health Office kan City nagkunpirmar na padagos na naglalangkaw an mga caso sa HIV-AIDS asin iba pang sexually transmitted diseases sa ciudad na dapat mag-aksyon na an LGU, sabi ni Rañola. Sa saiyang privilege speech sa ginibong regular session kan SP saiyang pigluwas an datus sa mga caso puon kan 1984 hasta kan 2016 na padagos na naglalangkaw. Kinua niya an oras sa sesyon bako sa pag-panic, bako lang bilang sarong doctor alagad bilang namamanan na nagtataong patanid sa publico contra sa nakakagadan na helang. Sa mga provincia sa Bikol, an Ciudad nin Naga asin Camarines Sur iyo an may halangkaw na caso sa HIV/AIDS puon kan 1984 hasta 2016. Sa Camarines Sur kan 2016 nagsakat sa 54 caso mientras na sa Naga igwang 17 caso, alagad puon kan 1984 hasta 2016 an satong provincia igwa nang 192 na caso mantang sa satong ciudad nag-abot na sa 71 caso, sabi pa ni Rañola. An City Health Office, sa pamamayo ni Dr. Vito ‘Butch’ Borja padagos an saindang mga ginigibong advocacia asin iba pang programa kan lokal na gobierno kan ciudad nganing mapugolan an paglakop kan delicadong helang alagad envez na maghuros an numero padagos na naglalangkaw. Naglalaoman an consejal na susuportaran kan saiyang mga pag-iriba sa SP an propuestong ordinansa alagad kaipuhan niya man giraray an suporta kan iba pang mga sektor asin cooperasyon kan magurang nganing pakusogon magbaba an caso. Base sa datus kan City hall asin kan National Youth Commission nagkukumpirmar na nag-abot na sa 62 por ciento an bagong caso sa HIV sa nacion kan 2016 mantang igwa nang mga victimang jovenes puon sa 15 hasta 24 años. (DPA)