9th ID nakaalerto sa pagbalos kan NPA

Saludo si Major General Manolito Orense Division Commander kan 9th Infantry Division Philippine Army sa Bikol sa saiyang mga soldados sa pakikipag laban contra sa mga rebeldeng New People’s Army sa kabikolan, alagad pig-alerto sa posibleng pagbaluos kan mga kalaban kan gobierno. Sa encuentro kan Alpha Company hale sa 83rd Infantry Batallion kaibahan an nagkapiranng miembros kan Cafgu laban sa treintang armadong grupo sa Barangay Pinamihagan, Lagonoy Camarines Sur kan Domingo, Marso 12) nakabawi an tropa kan militar nin apat na armalite rifle, sarong M-14 rifle, sarong machine gun, quinceng improvised explosive device, backpacks na may personal na mga gamit asin mga subersibong dokumento. Saro man an binawian nin buhay sa mga rebeldeng NPA na pinag bisto sana sa Alyas na Nick na susog sa militar may halangkaw na katungdan sa kilusan. Sa lado man kan Tomas Pilapil Command, nilusob soboot kan tropa kan militar an mga rebelde na nagkukunducir nin pulong–pulong sa lugar para aramon an problema kan mga paraoma digdi. Afuera sa encuentro sa banwaan nin Lagonoy, nagkaigwa man encuentro sa pag ultanan kan mga rebeldeng NPA sa Gubat,Sorsogon asin kan tropa hale sa 31st Infantry Batallion. Sa tahaw kan pag ogma sa trayumpo kan operasyon laban sa mga rebelde sa rehiyon, pinatanidan ni MGen Orense an saiyang mga taohan na dai maging kampante huli ta posibleng naghahalat lang nin tamang tiyempo an mga kalaban para magbalos. An pagkakabawi kan mga armas asin pagkagadan kan saindang mga kaibahan an magiging magabat na rason para mag-balos an mga rebelde. Huli kaini, inalerto kan nasabing oficial ang gabos na detachment asin patrol base kan 9th infantry division para pag-andaman an aktibidad kan mga kalaban kan gobierno. Digdi sa Camarines Sur, an mga banwaan sa Partido Area an higot na binabantayan kan 9th Infantry division huli ta yaon digdi an aktibidad kan mga rebelde huli naman kan mga bukid na lugar asin harayo sa presencia kan mga awtoridad. Bilang pag midbid sa matrayumpong operasyon kan mga soldados asin Cafgu, an pamayo kan 9th ID, nagtakod nin medalya asin nagtao nin plake sa doceng miembro kan Alpha Company hale sa 83rd infantry battalion na pinamamayohan ni Lt.Col Eduardo Monjardin, Batallion Commander asin kan duwang Cafgu. (Melvin Machado)