PNP CSur dai makikiaram sa investigacion sa paratudok na pulis

‘‘Dai makiki-aram an PNP Camarine Sur sa caso kan pulis na dinakop huli sa extortion’’ Ini an pigcierto ni P/Sr. Supt. Jerry Bearis, Provincial director kan PNP Camarines Sur sa ’pasalubong’’ sa saiyang liderato bilang bagong pamayo kan pulicia sa provincia. Susog ki P/Supt Errol Garchitorena, Jr , Public Information Officer kan Camarines Sur Police Provincial Office, nangangapudan an saindang oficina sa posibleng mga naging victima kan suspek na si PO2 Gilbert Embuestro namagdulok sa saindang oficina nganing matabangan. Puon ipasunod an internal cleansing sa organisasyon kan PNP nagkaperang pangaran nin mga pulis an ipinadara sa oficina ni PNP Regional Director Chief Supt. Melvin Buenafe para linawon an mga reclamo sa sainda. Kabali sa pinagmo-monitor an aktibidad kan nasabing suspek na pulis alagad bako pang malinaw kun ano an anomaliyang pinaggigibo kaini hasta mangyari an entrapment operation sa Ciudad nin Naga. Sa pagkakadakop sa suspek ina-aram ngonian kun igwang posibleng kasabwat. Si P02 Embuestro, aktibong miembro kan Intelligence Unit kan Pamplona Municipal Police Station an dinakop sa paagi kan entrapment operation kan Naga City Police Office, CSPPO-Intelligence Division, Regional Intelligence Unit asin kan grupo kan 9th Infantry Division kan Phillipine Army matapos i-reclamo nin extortion ni Rustal Oliva sarong foreman kan China-Geo Construction. Nagpabisto pa an suspek na miembro siya kan rebeldeng New People’s Army. Nabawi sa suspek an tolong Units nin celphone na may SIM cards na ginamit sa transaksyon, sarong calibre 45 na may Serial Number 2126541, may sarong magazine na may limang bala, sarong caliber 9mm TM Beretta na may PNP Logo Markings “PNP PROPERTY’’ asin may serial number G792232 na may sarong magazine asin doceng bala, wallet na may laog nin I.D asin an smart padala claim stub. Nasangatan na nin casong robbery with intimidation asin pagbalgar kan R.A 10591 si P02 Embuestro na dati man naka-destino sa Pili Municipal Police Station. (Melvin Machado)