SA PROPUESTONG WASTE TO ENERGY PROJECT: Kondisyon kan companya sa City Hall ‘imposible’

Dai kakayahon kan Ciudad nin Naga an quinientos (500) toneladang basura aroaldaw na hinahagad kan sarong companya na nag-oopresir nin waste to energy project sa Barangay San Isidro na lugar kan bubugtakan kan sanitary landfill project kan City Hall. Sinabi pa na imposible sa ciudad na itao an saindang kinakaipuhan na toneladang basura, huli kaini dai sinda puedi digdi, sabi ni Bise Alcalde Nelson Legacion. An hinahagad na kondisyon kan companya kaipuhan ninda an 500 hasta 1,000 toneladang basura aroaldaw na dai kayang iproducer ini kan ciudad, kun arog kaiyan an kahagadan ninda ‘no deal ta dai ta kaya’, sabi pa. Si Engr. Joel Martin, pamayo kan Solid Waste Management Office kan City Hall nagsabi na sagcod lang sa noventa (90) toneladang basura an saindang nakokolekta aroaldaw. An Baybridge Services Philippines, na pinamamayohan ni Lorelia Macabulos Ortega bilang Business Development Officer katuwang an Theold Bis International nagsumiter na kan saindang project proposal sa Sangguniang Panlungsod asin ipinasa muna sa Committee on Environment na pinamamayohan ni Consejal Salvador Del Castillo. Ipinahayag pa na an companya pueding magproducir nin quince hasta viente megawatts gikan sa hinahagad na 500 hasta 1,000 toneladang basura aroaldaw. Sinabi man kan pamayo kan komite na sainda man giraray aadalan an propuesto alagad ipapadagos na kan ciudad an sanitary landfill project mientras na pigtagamahan na ini nin sobra sa dos cientos milyon pesos gikan sa caja kan lokal na gobierno. Dinagdag pa ni Legacion na kan nakaaging sesyon regular kan SP mientras na yaon man sana an presencia kan mga representante kan companya pigtawan lang ninda nin opurtonidad na magpresentar kan propuestong waste to energy project alagad an saindang hinahagad na kondisyon imposibleng kayahon kaya ‘’no deal’’. Tada nang raya an ciudad asin dapat maging malikay sa paglaog sa ano man kondisyones arog kan nangyari sa C.G. Global Corporation pigparaparalaom kan waste to energy project alagad biglang nagsibog an korporasyon na sarong Korean firm. Napag-araman kan Bicol Mail sa mga representante kan companya na kun kulang an basura sa laog kan ciudad pueding magkolekta sinda sa pagtaraid na mga municipalidad na miembros kan Metro Naga Development Council asin maging sa iba pang lugar. Saro pa sa kondisyon kan companya an loteng gagamiton sa waste to energy project maghahale sa City Hall mientras an gabos na gastos sa proyecto hale sa saindang korporasyon na igwang kapital nin treinta y cinco hasta treinta y siete milyon dolyar. (dpa)