Alyansa vs droga bibilogon kan PNP Camarines Sur

Matapos kan rinibong pagsuko kan mga envuelto sa ilegal na droga sa Camarines Sur, nakatalaan mag-orgnisar nin mga Municipal Alliance of Drug Advocate na an miembros gikan sa nagsurokong dorogista nganing isakat sinda bilang advocator. Si P/Sr. Supt. Jerry Bearis, bagong PNP Provincial Director kan CamSur nagpahayag na saro ni sa saiyang tatawan prioridad parte kan estratihiya sa pagpadagos kan campaña contra sa ilegal na droga sa paagi kan Oplan Double Barrel, Reloaded. Dakul nang mga nagsuroko an nagtatabang na sa PNP sa campaña laban sa ilegal na droga kaya kaipuhan mabilog an saindang alyansa. Sa laog nin anom na bulan na guerra sa droga maabot sa veinte saes mil an nagsurokong paragamit nin droga base sa listahan kan panahon ni dating Acting Provincial Director Sr. Supt. Walfredo Pornillos. Alagad inaako kan PNP CamSur na dakul sa mga nagsuroko an nagbaralik sa actividad sa ilegal na droga bako lang sa narerecibing osip sa LGUs envez kumpirmasyon mismo susog sa intelligence report. Susog sa directiva ni PNP Chief Director General Ronaldo ‘Bato’ Dela Rosa saindang ipapadagos an guerra sa droga sa paagi kan inaapod na Oplan Double Barrel, Reloaded na katuwang na an lider relihiyoso. Bubuhayon an Oplan Tokhang sa paagi kan pagvisita sa mga harong sa barangay na dai man ini na-ngangahulogan dorogista an saindang kakaolayon envez ipasabot sa sainda an negativong efecto sa droga. Sinabi pa na si dating nagsurokong personalidad tinatawan sinda nin marhay na giya sa paagi nin espirituwal asin madisiciplina nganing dagos nang isikwal an ilegal na droga. Sa lado kan mga menor de edad na kabale sa grupo nagsuroko sa awtoridad yaon na sa pamamahala kan Department of Social Welfare and Development na igwang mga programa an ahencia para sa tamang disciplina asin matukdoan nin tama nganing dagos nang magreforma, sabi pa ni Bearis. Sa isyu kan posibleng may nagdadanay na drug laboratory sa provincia dai paman makumpirmar asin ini saro sa saindang pigsusubaybayan kan intelligence unit kun igwa man. (dpa)