SABI KAN DPWH: Poste kan Casureco II sa nat’l road kritikal sa mga aksidente

Naghiwas na an national road sa Barangay San Felipe, Ciudad nin Naga huli kan pig-iimplementar na road widening project kan Department of Public Works and Highways alagad delicado sa mga aksidente sa trafico an mga ulang na poste kan Camarines Sur II Electric Cooperative (Casureco II). ‘Kritikal an lugar sa San Felipe, an solusyon digdi iyo an paghale kan mga poste kan Casureco II’. Ini an mga pahayag ni Assistant District Engr. Richard Ragrario kan 2nd Engineering District kan DPWH kan Camarines Sur sa ginibong committee hearing kan Public Safety Committee na pinamamayohan ni Consejal Joselito Del Rosario sa isyu sa pagpahale kan mga ulang na estractura sa tinampo. Nagkapera nang mga vehiculo an nakabudal sa poste na namumugtak sa atubangan kan Maramba Elementary School sa Brgy. San Felipe, na malilikayan an aksidente kun matugot na an manijamiento kan cooperativa nin electricidad na ibalyo na an saindang poste sa tamang lugar. Sinabi ni Engr. Ragrario na nagkaigwa na nin orolay an 2nd Engineering District kan DPWH asin Casureco II alagad dai nag-uyon an saindang oficina central sa kahagadan kan cooperativa na dapat gastosan kan obras publica an paggarabot kan mga poste. Pigbuyagyag pa kan Assistant District Engr. an saro sa mga kondisiyon kan cooperativa abunaran kan DPWH an magiging revenue loss sa panahon na pinutol muna an servicio kan corriente mientras na pigtatrabajo an pagbalyo kan mga poste alagad dai nag-uyon an central office. Sa sinambit na committee hearing, sinabi ni Consejal Del Rosario na envez kan pigtutulod niyang tripartite memorandum of agreement entre kan Casureco II, DPWH asin City Hall, mapasar muna siya nin resolucion sa Sangguniang Panlungsod nganing aramon sa Deparment of Energy asin DPWH Central Office kun ano na si nangyari na dapat magkaigwa nin kasundoan an duwang ahencia sa pagtarabangan sa kompensyasyon sa paghale kan estractura sa laog kan tinampo. Susog sa consejal sa Implementing Rules and Regulation (IRR) kan Acta Republica Numerado 10531 an DOE asin DPWH sa laog nin 180 diyas dapat maggibo nin mga reglamento sa pagtao nin maninigong kompensyasyon sa cooperativa nin electricidad alagad inabot na nin tolong taon mayo pa nin kasundoan an DOE asin DPWH. An katuyohan kan City Hall kaini, para sa seguridad publico kun maresolberan na an isyu na pueding i-adaptar kan ibang LGUs, sabi pa kan consejal. Nagpatanid pa si Del Rosario na kun mayo pang solusyon an duwang ahencia, posibleng sa bulan nin Septiembre 2017 mahimo na siya nin aksyon sa paagi kan tripartite MOA. (DPA)