Satellite registration kan Comelec pigpipilahan

Kun dai pa tuyohon kan Comelec an mga barangay asin escuelahan sa paagi kan satellite registration, padagos na matomal an nagpapalistang mga calificadong votantes nganing makaparticipar sa pirilian sa Barangay asin Sangguniang Kabataan na pigtalaan gibohon sa Oktubre 23, 2017. Sa datus kan Comelec Camarines Sur base sa osip kan Election Officers gikan sa manlaen-laen na mga municipio inaabot sana nin sampulo hasta viente an nagpipila nganing magparehistro alagad kun sa satellite registration sa barangay asin escuelahan nagpapako sa 60, 80 hasta sa 100 na mga registrant, sabi kan oficial na parataram kan Comelec CamSur na si Alexander Marpuri. Bukas an saindang mga oficina cada Sabado nganing matawan opurtonidad si estudiantes asin nagtatrabajo alagad bilang sana sa muro an nagpapalista. Target ninda an otso hasta diez mil na bagong registrants na kinababalehan nin nag-eedad 15 hasta 17 años asin 18 años pasakat maging si nagbalyong pig-eerokan. Sa ginibong pirilian lokal asin nacional kan Mayo 9, 2016 an provincia igwang maabot sa on milyon na rehistradong votantes asin malangkaw ini nin abot sa diez por ciente defende sa resulta kan nagpapadagos na continuing registration sa mga oficina lokal kan Comelec. Nagpuon an pagpalista sa Comelec kan Noviembre 7, 2016 asin matapos ini sa Abril 29, 2017, anom na bulan antes kan nakatalaan na Barangay asin SK elections sa Oktubre 23. Sinabi pa ni Marpuri na igwa nang draft resolution an saindang oficina central para sa calendar of activities kasunod kan pag-andam kan pigtalaaan na pirilian asin digdi ma-aaraman kun anong petsa an pagplantiar nin certifico de candidatura. Alagad sinabi pa kan Comelec CamSur, sa isyu kan posibleng macancelar naman an sinambit na Barangay asin SK elections mientras na tinatawan nin prioridad kan administrasyon an campaña sa pigtutulod na federalismo, magdedefende ini sa congreso asin naghahalat sana sinda kan ipapaluwas na resolucion. (DPA)