CSur, Naga vs pagnombra kan oficiales de barangay

Nagkaperang pamayo asin dating pamayo kan Liga ng mga Barangay sa Ciudad nin Naga asin Camarines Sur nagpahayag kan saindang panindugan na dapat mandato man giraray kan mga electorado sa barangay iyo an magdesisyon sa pagpili nin oficiales de barangay envez kan pagnombra nin officers in charge. Ini an naheheling na tama asin dapat ipadagos kan administrasyon ni Presidente Duterte base sa probisyon kan Local Government Code, segun sa mga pahayag ninda presenting Liga President Tomas Ramon Sanchez kan Ciudad nin Naga asin Jose San Buenaventura Jr. kan Libmanan, Camarines Sur asin sinda dating Liga Presidente na ngonian Alcalde Tomas Bongalonta kan Pili, Camarines Sur, Julian Lavadia Jr. asin Vidal Castillo kan Ciudad nin Naga na parejo nang regular na miembros kan Sangguniang Panlungsod. Igwa nang pendienteng House Bill 5359 na pigsangat ni administration Congressman Robert ‘Ace’ Barber na nag-uuktaba kan Barangay asin SK Elections envez kan Oktubre 23, 2017 pigtalaan sa Oktubre 2020 asin dapat taposon na an termino kan mga incumbent officials nganing tawan nin bueldo si Presidente Duterte sa pagnombra nin officers in charge. An lakdang kan administrasyon nganing malinigan an 42 mil na barangay na segun sa Malacañan nasa cuarenta por ciento kan oficiales de barangay envuelto sa ilegal na droga asin kurapto. Sinabi ni Sanchez, Castillo asin Lavadia na mas efectivo man giraray an elihidong oficiales kan barangay huli ta respetado sinda ta nakatukaw sa puesto sa kagustohan kan tawo envez kan tinukdo sana nganing patukawon sa Barangay orog na kun sinda kaalyado sa politica na contra sa boot kan residentes kan barangay. Ano man na dikta kan appointing officer iyo an saindang susunodon dawa mayong konsultasyon sa publico mantang daing gayo ninda prioridad an sentimiento kan publico asin mayo nang boses an residentes kan barangay, sabi pa ninda. Dinagdag pa ni Sanchez na maogma man giraray sa pagmate kan barangay na an nakatukaw sa Barangay Hall napili sa paagi nin eleksyon. Sinabi man ni Castillo, kun mangyayari an plano kan Malacañan an irerecomendar sa puesto permi nang si harani asin kaalyado kan administrasyon Duterte. Si Lavadia nagsabi na nakatalaan siyang magpasar nin resolucion sa Sangguniang Panlungsod contra sa propuesto kan Malacañan asin kun mayo nang eleksyon an dapat magnombra iyo an jefe ejecutivo lokal huli ta igwa sindang accountability. Kun an plano kan administrasyon idagos mayo sindang magiginibo magsunod, sabi ninda Alcalde Bongalonta asin Liga President San Buenaventura. Alagad sinabi ninda na mas marhay man giraray an preskong mandato kan mga electorado. Ipinahayag pa kan Liga Presidente kan Libmanan, kan nakaaging Marso 22-24 nagkaigwa sinda kan 2017 Regional Congress kan Rehiyon cinco na ginibo sa Philippine Trade Training Center sa Manila. Kabale sa nagtaong mensaje sa sinambit na congreso iyo an DILG na nag-aasegurar sa incumbent barangay officials na kun dai man sinda envuelto sa droga asin marhay an saindang acomplisimiento pueding magpadagos nganing manombrahan giraray. Kun mangyari ini pabor sa mga incumbent barangay officials, sabi pa ni San Buenaventura. Sinabi pa kan mga nagcocontra base sa Local Government Code of 1991, or mas midmid sa Republic Act No. 7160, nagmamando na dapat an mga pipilion na oficiales de barangay iyo an punong barangay asin pitong mga barangay kagawad. (DPA)