Federalismo pinapaliwanag sa mga asembliya sa brgy.

An pigtutulod na federal form of government kan administrasyon ni Presidente Duterte, saro sa directiva ni Department of the Interior and Local Government (DILG) Secretary Ismael Sueno na kabale sa dapat ipaliwanag sa mga asembliya sa barangay na nagpapadagos sa manlaen-laen na barangay kan rehiyon Bikol. An oficina rehiyonal kan DILG Bikol sa pamamayo ni Director Elouisa Pastor nagpahayag na susog sa Memorandum Circular 2017-31 ni Secretary Sueno petsado Febrero 13, 2017 dapat punan na sa mga asembliya sa barangay an pag-introducer asin pagpaliwanag kan forma kan gobierno federal. An federalismo saro sa kamawotan kan Malacañan na iyo an iribay sa presenting forma nin gobierno kan Filipinas, alagad kadakle sa mga Kapitanes de Barangay kulang sa pagkasabot kan forma federal na gobierno dawa na ngani sinda pinaatendir na sa mga seminar na pinadrenohan kan DILG. An solusyon kan barangay kuanon an tabang kan mga DILG Officer sa municipio nganing iyo an magpaliwanag kan forma kan gobierno federal. An sarong LGU igwa sanang saro hasta sa duwang DILG Officer kaya ngani okupado an saindang mga oras na nagiging dahilan dai tolos makaconducir kan asembliya an ibang mga brgy. Nagkapera nang oficiales de barangay sa Ciudad nin Naga asin sa iba pang mga banwaan na inaako ninda na dai ninda maipaliwanag an pigtutulod na federalismo kan presenting administrasyon mantang mayo sindang pagkasabot. An tema sa mga asembliya sa barangay iyo an pagpa-orog sa campaña laban sa droga asin iba pang mga kriminalidad, pagbuhay kan Barangay Anti Drug Abuse Council (BADAC), mga acomplisimiento asin programa kan barangay council asin pagsumiter sa publico kan saindang financial report. Sinabi pa kan DILG Bikol na base sa memorandum ni Sueno igwang aatubangon na caso administrativo an barangay officials kun dai mapa-apod asembliya. An siisay man na residente kan barangay, concerned citizen, oficial kan gobierno asin NGO puedeng magsangat caso sa Sangguniang Bayan o Sangguniang Panlungsod base sa Seksyon 61 kan Local Government Code o kun dai man sa Ombudsman.