Naga, binibisita nin rinibong turista sa semana santa



Maabot sa quince mil hasta dieciseis mil na turista an madagsang turista sa Ciudad nin Naga ngonian na semana santa na kadakle nabisita sa mga private resorts asin government-managed natural attractions sa itaas na mga barangay kan Carolina asin Panicuason, kabale an Mt. Isarog Natural Park. Mas halangkaw ngonian na taon kun itatampad sa anom na aldaw o panahon nin semana santa kan Marso 22-27, 2016 na igwang total na 12,881, sabi kan Arts, Culture and Tourism Office kan City Hall. Si Alec Francis Santos, jefe kan ACTO nagsabi na kabale sa mga binibisitang lugar iyo an Malabsay Falls sa Mt. Isarog, Panicuason Hot Spring Resort, Haciendas de Naga, Peñafrancia Basilica Minore na pig-eestaran kan orihinal na imahen ni Nuestra Señora de Peñafrancia asin iba pang mga lugar na perming binibisita kan lokal asin dayuhan na turista. Ngonian na panahon na bakasyon nin mga estudiantes dakul an nagdadayong magkarigos sa preskong tubig kan Malabsay Falls asin Hot Spring sa Brgy. Panicuason. Abot sa 17 kilometros an distancia hale sa centro kan ciudad sundo sa itaas na lugar kan Panicuason. Madale nang matapos an concretong patinampo kan ciudad pasakat sa Malabsay Falls. Sinabi pa kan ACTO padagos naglalangkaw an numero kan mga nagsusongkong turista sa ciudad sa laog na nin apat na taon puon kan 2013 hasta 2016. Base sa saindang datus hale sa dating 859,743 kan 2013, an numero kan mga turista nagtalubo sa 1,209,202 kan 2016 mantang kan 2014, an numero kan mga turista na nagsungko sa ciudad nag-abot sa 947,808 asin kan 2015 nagsakat sa 1,057,172. Kun hehelingon sa por cientaje, naglangkaw nin 13.38% kan taon 2014 kun itatampad kan 2013 mientras na naglangkaw naman sa 14.38 % kan 2016 kun itatampad kan 2015. Concretong Patinampo kaipuhan Puedeng makatabang sa programa sa turismo an planong Camarines Sur Catanduanes Friendship Bridge alagad kaipuhan an concretong tinampo bako lang na masumpay kan duwang provincia envez dapat helingon kan gobierno an kamugtakan kan Tinambac-Siruma road. Ini an reaksyon kan oficina kan ACTO sa posibleng marealisar na proyecto sa tulay na papabulosan nin bilyones pesos na fondo na dakulang bagay alagad kun mayong toltol na tinampo, daing gayo mapapakinabangan. An CSur-Catanduanes Friendship Bridge haling Virac, Catanduanes makonektar sa Caramoan, Camarines Sur alagad an pasajeros na ma-viaje pasiring sa Caramoan na maagi sa Tinambac-Siruma road nagrereclamo sa kamugtakan kan rulobak-lobak na tinampo. Bantogan na an banwaan nin Caramoan na pigdadayo nin lokal asin dayuhan na mga turista na kun marealisar an tulay asin igwa pang concretong tinampo makakatabang bako lang sa lado nin turismo sa Naga asin Camarines Sur envez maging sa economia, sabi pa ni Santos. Sa programa kan Department of Tourism (DoT), kaayon sa saindang pigheheling na an sarong tourism destination mas lalong mauswag kun igwang marhay na tinampo na pacil sa transportasyon. (DPA)