100 hektarya lote solusyon sa nagdadany na squatters

Kinakaipuhan pa an abot sa sangatos (100) hektaryang lote na babakalon sa cantidad na P350 milyon nganing resolberan na kan lokal na gobierno kan Ciudad nin Naga an problema sa nagdadanay na squatters sa mga barangay na sagcod sa ngonian rinibo pa an pendienteng aplicante sa Housing Settlement and Development Office (HSDO) kan City Hall. Si Consejal Julian Lavadia Jr. miembro kan Committee on Housing and Urban Poor sa Sangguniang Panlungsod nagpahayag sa saiyang privileged speech sa sesyon regular kan Martes, Mayo 2, 2017 na kaipuhan nang ‘tuldukan an problema sa urban poor, ta kun bako ngonian nuarin pa? An P350 milyon na fondo bako lang gikan sa caja kan lokal na gobierno envez mahagad nin ayuda sa Housing and Urban Development Coordinating Council (HUDCC), mantang saro ni sa obligasyon kan ahencia na magtabang sa mga programa sa pagpaharong. Saiyang pigbuyagyag na base sa datus kan National Housing Authority, maabot pa sa 2,600 na kaharongan an nagkagaraba matapos maglamasa si bagyong Nina kan Diciembre mantang nasa 3,000 na kaharongan an yaon pa sa gilid kan relis kan PNR sa Ciudad nin Naga. Afuera kaini, igwa pang pendienteng mga aplicante sa HSDO na nag-aabot sa labing siete mil katawo. Sindang mga Nagueños na naghahalat nin asistencia sa LGU sa laog na nin nagkaperang taon. Saiya pang sinabi na an Kaantabay sa Kauswagan (KSK) na pig-introducer kan 1989, pigkakarkulong nasa cinco mil na kaharongan na klasipikado bilang mga squatters o mayong permanteng estaran. Kun itatampad an bilang sa masunod na 28 taon, ngonian na 2017, igwa nang labi sa 2,000 na familya an naghahagad nin tabang kun itatampad kan panahon na magpuon kita sa programa. Sinabi pa an propuestong pagbakal nin sangatos hektaryang lote sa Barangay Carolina babakalon sa hababang presyo na P350 cada metro cuadrado. An total na P350 milyon na babakalon na lote, mahagad an LGU nin ayuda sa HUDCC para sa saindang programa bako lang sa pagpaharong alagad para sa livelihood, salud, edukasyon, paz y orden, recreation asin simbahan na ipapaconstruhir sa lugar kan proyecto. Kun ini marealisar matatabangan an siete mil na mga aplicante sa HSDO na padagos naglalaom matatabangan kan lokal na gobierno asin solusyon sa problema sa squatters, sabi pa. Dinagdag pa kan consejal na kun an City Hall naka-desisyon na mag-gastos nin P260.7 milyon para sa konstruksyon kan Sanitary Landfill na magagamit sana sa laog nin lima hasta sa diez años. Ano ta dai makagastos kan 35 por ciento para sa proyecto nganing matawan benipisyo an pobreng Naguenos. An ‘P350 million investments are recoverable kun itatampad sa P260.7M na sanitary landfill, an mga makikinabang kan socialized housing project magbabayad kan saindang bulanan na amortization sa lokal na gobierno’, sabi pa.