Comelec nag-aandam na kan pirilian sa Brgy., SK



An Commission on Election maandam na kan nakatalaan na Barangay asin Sangguniang Kabataan elections sa Oktubre 23 ngonian na taon matapos kan ultimo dia kan anom na bulan continuing registration kan Abril 29. An mga oficina lokal kan Comelec magpapadagos kan saindang pag-andam sa maabot na pirilian sagcod na mayong pinasar na ley sa congreso na nag-uuktaba kan Brgy. asin SK election. Sa Camarines Sur, sinabi ni Alex Marpuri parataram kan Comelec digdi na isusunod nindang trabajo iyo an pag-andam kan maabot na pirilian mientras na tapos na si continuing registration na dai nang gayo minate si sobrang suroksokan sa pagpalista kan bagong votantes kan Sk asin barangay kan huring aldaw. Hinahalat na kan mga oficina lokal an Comelec resolution gikan sa oficina central para sa calendar of activities nganing iyo an saindang sunodon sagcod sa pagplantiar nin certifico de candidatura kan mga candidato sa barangay asin SK. Unikong an ley na ipapasar kan congreso sa pag-uktaba kan pirilian iyo an makakapugol kan pirilian, alagad sa ngonian dai pa pigpuponan an deliberasyon. Sa nagtapos na rehistrasyon sa Comelec, piglalaoman na malangkaw nin otso hasta diez por ciento an rehistradong votantes kan Camarines Sur na dugang sa dating on milyon na votantes kan nakaaging pirilian kan Mayo 2016. Sa Liga nang mga Barangay, sinabi ni Liga President Tomas Ramon Sanchez kan Ciudad nin Naga na posibleng dangogon ni Presidente Rodrigo Duterte an resolucion kan saindang National Liga na nagcocontra sa planong mag-nombra na sana nin mga officer in charge. Hinahagad kan National Liga na dapat irespeto an mandato kan tawo na iyo an magdesisyon sa pagpili kan oficiales de barangay bako sa dikta sana kan arin man na pamayo kan gobierno. An saindang resolucion inaprobaran kan mga Liga President puon sa Luzon, Visayas asin Mindanao asin nagtutubod sinda na dadangogon ini kan Malacañan asin Congreso.