PAGDEMITER KAN SARONG P01: Mga akusasyon vs superior officers pig-iimbestigaran na kan Bikol PNO

Ciudad nin Legaspi - Aakuon kan Bikol PNP an pagdemitir kan sarong Police Officer 1 kan Catanduanes na nag-aacusar sa saiyang superior officer na suboot nagsugo sa paglikidar sa drug pusher nganing magkaigwa sinda nin acomplisimiento sa guerra laban sa droga kabale na an isyu sa kurpasyon, alagad gigigibo na an busising imbestigasyon nganing patas para tamang justicia. Ini an mga pahayag ni Chief Supt Melvin Ramon G. Buenafe, regional director kan Bikol PNP sa mainit na mga akusasyon ni PO1 Vincent Tacorda, 30, na igwa siyang mga evidencia asin kaya niyang probaran mientras na igwa pa siyang pugol na recorded na orolay sa telepono, asin an saiyang nakakalangkaw na oficial kabale na an saro pang oficial kan PNP sa Catanduanes sa paggadan sa suspechadong dorogista na pigmidmid sa ngaran na Samuel Rojas kan Viga Central Elementary School. Si Rojas, nasa rank No. 1 pusher sa Viga, Catanduanes binadil mantang nagdadalan TV sa sarong electronics shop sa Brgy. San Jose, kan Agosto 10, 2016 alagad nakasalbar sa kagadanan. Sa text messages sa Bicol Mail ni RD Buenafe, Regarding resigned PO1 Tacorda, I respect his rights and sentiments, karapatan niya na mag-desisyon kung anong gagawin niyang mga action. Sa palagay ko alam niya at alam nating lahat na an bawat desisyon na ginagawa natin ay may kaakibat na mga implikasyon at responsibilidad. Kaya tatangapin po natin ang kanyang pagbibitiw sa tungkulin, dahil mahirap naman na pilitin natin siya kung ayaw na niyang magtrabaho. Ang kangyang mga akusasyon laban sa mga dating nagging opisyal niya ay ini-imbistigahan maigi; it is but appropriate to address the matter at the right venue, for fairness and justice. Sa mga pahayag ni Tacorda sa miembros kan media sa Bikol, saiyang sinabi nagdesisyon siyang tuwadan na an serbisyo sa PNP huli ta dai na maako kan saiyang konsensya an mga malaen na gibo asin sugo kan nagkaperang halangkaw na oficial kan saindang organisasyon na kinaka-envueltohan sarong police superintendent asin police inspector. Saiyang pigbuyagyag na tinawan siya nin misyon na gadanon si Rojas matapos sayumahan ini kan saiyang pag-iriba. Kun nagadan an drug pusher, iyo na ini an pinakaenot na extra judicial killing sa Islang provincia kan Catanduanes. Pig-osipon pa ni Tacorda sa media na napiritan niyang akuon an misyon huli ta dai niya direktang masayumahan an orden gikan sa nakakalangkaw na oficial. Ipinahayag pa na base sa police report duwang motorcycle-riding suspects iyo an nagbadil ki Rojas asin saro si Tacorda sa suspechado na tinamaan sa likod an victimang si Rojas alagad nakasalbar an saiyang buhay. Dinagdag pa ni Tacorda matapos mabadil si Rojas, si Sr. Inspector Nathaniel Jacob suboot hinapot siya kun ta’no ta dai nagadan si Rojas. Kan panahon na mangyari an sinambit na insidente si Jacob OIC kan Viga Municipal Police Staion. Afuera pa kaini, saiyang pigbuyagyag an anomaliya sa pagkaka-arestar ki Manuel Huit Jr., numero unong drug suspect sa Catanduanes na nasamsaman nin shabu na nagcacantidad sa on milyon pesos asin duwang caliber 38 revolvers alagad kan makaabot sa jepatura, kadakle kaini niribayan nin tawas. Si Huit perming naheheling na nagbibisita sa PNP Provincial Office kan Catanduanes, sabi pa. Kan Abril 26, 2017 si Tacorda nagsumiter kan saiyang irrevocable resignation ki Sr. Supt. Jacinto Culver Sison, pamayo kan Bikol PNP Regional Headquarters Support Group sa Camp Simeon Ola sa Ciudad nin Legaspi. Dai ko na kayang magpadagos sa trabajo huli sa grabing ‘pressure’ na apektado na an sakuyang familia, sabi pa kan police officer. Andam siyang mag-atubang sa ano man na imbestigasyon alagad mawot niyang gibohon ini kan National Bureau of Investigation Naghihinanakit pa si Tacorda apesar kan saiyang mga naginibohan sa guerra contra droga alagad an saiyang superiors ibinalyo siyang destino sa RHSG hale sa provincial police force kan Catanduanes na saiyang pigcoconsidera na demosyon.