Mayong secret jail sa Bikol –RD Buenafe

Ciudad nin Legaspi - An Philippine National Police (PNP) sa Bikol nagcierto na mayong nagdadanay na secret jail sa anom na provincia kan rehiyon cinco arog kan nadiscobre kan Commission on Human Rights (CHR) sa sarong Police Station sa Manila. Si Regional Director Chief Supt. Melvin Ramon Buenafe kan Camp General Simeon Ola nagpahayag na mayo sindang tagong presohan sa manlaen-laen na Municipal Police Station kasunod kan saindang mga ginigibong regular na pag-inspeksyon sa mga selda antes pang nagputok an isyu sa ‘secret jail’ sa Manila. An Bikol PNP nagsumiter na kan saindang official report ki PNP Chief Director General Ronald ‘Bato’ Del La Rosa nganing maaraman na mayong isyu sa secret jail sa Kabikolan. Sinabi pa na an mga Municipal Police Station igwang sadit sanang selda huli ta kulang man an piglalaoman digdi na mga nagkakadarakop na kriminal mantang binabalyo man sana sa mga Bureau of Jail Management and Penology (BJMP) asin an iba sa Provincial Jail na pinapadalagan kan gobierno provincial. Puon na iimplementar kan PNP an guerra laban sa droga kadakle kan mga kinokonkon sa carcel nag-aatubang nin caso sa pagbalga kan Acta Republica 9165 o mas midmid sa Comprehensive Dangerous Act of 2002. Maging sa mga jusgado naglaba an listahan kan mga acusado na envuelto sa droga. An Bikol PNP nagpapadagos kan saindang guerra contra droga sa paagi kan Oplan Double Barrel, Reloaded mala ngani sunod-sunod naman an nagkakadarakop sa operasyon kan PNP asin PDEA. (DPA)