Plastic bags igwa nang karibay



IPANGALAD man an paggamit nin plastic bag alagad an ordinaryong namamanuan na naggigibo nin bayong, supot, basket o ano paman na klaseng pamatos nin mga sinaodan sa mercado makakatabang sa saindang hanap buhay. An plastic bags bako man gibo digdi sa Naga o Camarines Sur alagad oras na makalusot na sa Sangguniang Panlungsod an propuestong ordinansa sa pagpangalad kaini, dakul an makikinabang sa maproducer nin sadiring pamatos sa sinaodan, sabi ni Consejal Salvador Del Castillo. Si Castillo, pamayo kan Committee on Environment and Energy sa SP iyo an nagpapadreno kan ordinansa sa pagpangalad nin paggamit nin plastic bags huli kan maraot na epekto kaini sa kapalibotan. An Solid Waste Management Office (SWMO) kan City Hall sa pamamayo ni Engr. Joel Martin pabor sa pigtutulod na ordinansa sa sangguniang huli ta veinte cinco por ciento kan noventang toneladang basura na nakokolekta aroaldaw gikan sa plastic component. An plastic bags dai nalalapa asin nakakaulang pa sa pag-irarum kan basura na nagreresulta sa padagos na paglangkaw kan Balatas dumpsite. Igwa nang mga lokal na gobierno na estrictong na-iimplementar an pagbawal sa plastic bag asin tubod an consejal na panahon nang maprobaran an ordinansa na may titulong ‘Ordinance prohibiting the use of plastic bags on dry goods, regulating its utilization on wet goods, and providing penalties for violation thereof’ Dinagdag pa kan consejal na malangkaw pa an benta kan mga produkto sa handicraft oras na marealisar an sinambit na ordinansa. Matalaan nin public hearing asin posibleng maaprobaran na an propuestong ordinansa sa bulan nin Julio ngonian na taon. An Namasfed, grupo nin mga paratienda sa Naga City People’s Hall iyo an nagcocontra alagad kun para sa karahayan kan publiko asin masusunod man giraray an mayoria kan namamanuan kan ciudad daing kaulangan para ipasar an ordinansa, sabi pa kan consejal. (DPA)