Tolong aldaw na Farmers Festival gigibohon sa DA Bikol

Pili, Camarines Sur - Bako lang panahon nin mga fiestahan sa barangay an bulan nin Mayo alagad tinawan halaga kan Departamento de Agricultura an bulan na ini komo Farmers Festival na nagtalaan nin actividades para sa mga paraoma asin parasira. Tolong aldaw an gigibohon na tiangge sa laog kan laguerta kan DA Bikol sa San Agustin, Pili, CSur na mapuon sa Mayo 15- 17, 2017 asin an programa may titulong Pagdiriwang ng Buwan ng Magsasaka at Mangingisda asin an Tema ‘’Masaganang Agrikultura at Pangisdaan, Masaganang Bansa’’. Maheheling an mga lokal na produkto kan sektor nin paraoma arog kan gulayon, mga pantanum asin dakul pang iba na ipapabakal sa baratong presyo. Sa Mayo 15 alas 9:00 nin aga iyo an pagbubukas kan ceremonia kan Farmers Festival 2017, alas 10:00 nin aga iyo an training on vegetable processing, magkakaigwa nin barangay food terminals asin organic farmers nganing i-display an saindang agri products durante sa tolong aldaw na tiangge. Para sa bulan na ini kan paraoma asin parasira, si Sekretaryo Manny Piñol pigdesignar an Regional Agriculture and Fishery Council na dapat tawan ninda nin prioridad an celebracion bilang pagmidmid sa sinambit na sektor na katuwang kan namamanuan asin gobierno. Magiging bukas sa publiko an laguerta kan DA Bikol nganing magbisita asin maheling an mga manlaen-laen na produkto asin makabakal nin gulayon, frutas asin dakul pang iba. (dpa)